د ملي امنیت شورا وايي چې طالبانو د هغه نوملړ له مخې د افغان دولت بندیان نه دي خوشې کړي چې ورته سپارل شوی دی.
ملي امنیت شورا د دولت د بندیانو نوملړ شاوخوا دوه اوونۍ وړاندې په کابل کې د طالبانو تخنیکي ټیم ته سپارلی و.
د ملي امنیت شورا ویاند جاوید فیصل نن په یوه خبري غونډه کې وویل، د طالبانو له لوري خوشې شويو بندیانو ډېره برخه ملکیان دي او یوازې ۱۹ پهکې امنیتي ځواکونه دي.
د نوموړي په وینا، د هغو ۲۰ کسانو په ډله کې چې طالبانو په کندهار خوشې کړي، ۱۰ یې د څلورو ماشومانو په ګډون ملکیان دي.
فیصل زیاتوي، د هغو ۴۰ بندیانو په ډله کې چې دې ډلې په لغمان ولایت کې خوشې کړي، ۹ یې د امنیتي ځواکونو برحاله سرتېري او ۱۲ نور یې هغه سرتېري دي چې یادې ډلې ته تسلیم شوي وو. د هغه په وینا، یاد ۱۲ بندیان به تر څېړنې وروسته په کابل کې بندیان شي.
د ملي امنیت شورا ویاند دغه راز وايي، په لغمان کې د خوشې شویو کسانو په ډله کې ۶ یې د امنیتي ځواکونو پخواني سرتېري او ۳ نور یې هم د دولت ملکي کارکوونکي دي.
فیصل وايي، د هغو ۴۰ کسانو په ډله کې چې په لغمان کې خوشې شوي، ۲۸ یې د امریکا او طالبانو د هوکړهلیک تر لاسلیک وروسته نیول شوي او له یوې میاشتې ډېره موده یې د یادې ډلې په بندخونه کې تېره کړې ده.
جاوید فیصل وايي، طالبان باید له نوملړ سره سم د امنیتي ځواکونو بندیان خوشې کړي او دغه راز له دې ډلې سره نور بندیان ملکیان هم باید خوشې شي. د نوموړي په وینا، طالبان باید په «خپلو شکنجهخونو» کې بندیان و نه لري.
د ملي امنیت شورا ویاند له طالبانو سره د کمعمره بندیانو د موجودیت په تړاو د ملګرو ملتونو له سازمان، سره صلیب او بشري حقونو کمېسیون نه غواړي، څو په دې برخه کې لاس پهکار شي او د ماشومانو د نیولو او د نظامي موخو لپاره کارولو په اړه ورسره خبرې وکړي.
طالبانو تر اوسه په دې اړه څه نه دي ویلي.
د ملي امنیت شورا وايي، د طالب بندیانو د خوشې کولو بهیر درېدلی نه دی او د ولسمشر د فرمان له مخې به ۱۵۰۰ هغه خوشې شي.
د امریکا او طالبانو ترمنځ د شوې هوکړې له مخې باید ۵ زره طالب بندیان د حکومت له بندخونو خوشې شي او طالبان هم باید د امنیتي ځواکونو ۱۰۰۰ بندیان خوشې کړي.
ټاکل شوې د دواړو لوریو ترمنځ د بندیانو له تبادلې وروسته د افغان حکومت او طالبانو ترمنځ د سولې مخامخ خبرې پیل شي.
