د ځينو رسنيو له خوا داسې راپورونه خپاره شول، چې د ولسمشر محمد اشرف غني او د بلخ سرپرست والي عطامحمد نور ترمنځ ځينې هوکړې شوې، چې پر بنسټ يې د ولسمشر د ځينو ژمنو په بدل کې به عطامحمد نور د بلخ ولایت پريږدي او کابل ته به راځي.
په راپورونو کې، چې "د شمال امپراطور بلخ پريږدي" راغلي؛ عطامحمد نور به په یو مهم پوست کې د مقررېدو په خاطر کابل ته راځي او د بلخ ولایت له پاره یې یو تن د خپلو نږدیو ملګرو څخه ولسمشر ته معرفي کړی او ولسمشرغني هم ورسره هوکړه کړې ده.
د رسنیو له خوا په خپرو شویو راپورونو کې راغلي، چې ګوندې عطامحمد نور ولسمشر ته د ځينو نورو اشخاصو د ګومارلو لیست هم سپارلی دی.
عطامحمد نور سلام وطندار ته د یوې اعلاميې په لېږلو سره ویلي، چې د ولسمشر غني سره يې په ځلونو خبرې کړي او پر وینا يې د یو څو څوکیو د ترلاسه کولو له پاره هوکړه اصلاً له "ارګ سره د مذاکراتو په دستور کې نه و".
نوموړي زیاته کړه، چې د دولت د یو غړي په صفت حق لري، چې له ولسمشر سره خبرې وکړي، خو" د مطلب د لیکونکي ناقص اطلاعات دلته دي، چې زما ټولې غوښتنې يې د یو څو تنو په ګومارلو نغاړلې دي."
د عطا محمد نور په نظر: "یاد شوي بستونه له دې مخکې هم د دوی د نږدې او د هېواد د وړ اشخاصو له خوا نه پر مخ وړل کېدلې او دا له ولسمشر غني سره د خبرو اترو جدي جز نه دی."
د بلخ ځای ناستي والي سلام وطندار سره په خبرو کې زیاته کړه، چې دوی پر اصلاحاتو ټینګار کوي: "موږ پر سیاسي هوکړې او ټاکنیز نظام کې د سمون پر سر په خبرو اترو کې ټینګار کړی او دا مو خپلې اصلي غوښتنې ګڼلې دي."
د ده په خبره، تر اوسه په مذاکراتو کې د دوی غوښتنې نه دې منل شوي. دی د خپلې دندې په اړه د ورځپاڼې بې باوره خبره ردوي؛ وايي: " هغه څه چې د ورځپاڼې په لیکنه کې زما د دندې په اړه لیکل شوي؛ بېخې بې بنسټه دي، ځکه ما هېڅ ډول دنده نه ده غوښتې او دا موضوع ما ته لومړیتوب نه لري، چې په خبرو اترو کې د ځان له پاره کوم مقام وغواړم".
د خپور شوي مطلب له مخې، گلزلمی یونسي، عبدالجبار آریایي، محمدجواد عثماني او محمد ربیع به په ترتیب سره د افغانستان د سفیر په توګه تاجیکستان کې، په المان کې د سفارت معاونیت په صفت، د اقتصاد وزارت مرستیال او د عامې روغتیا وزارت مرستیال په توګه ولسمشر ته وړاندې شوي.
د بلخ ځای ناستي والي سلام وطندار په خبرو کې د بیان ازادۍ ته په احترام سره وویل، چې دا ډول راپورونه او رسنۍ به د خلکو جمعي باور ته زیان رسوي او په ټولنه کې خپل اعتبار له لاسه ورکوي.
