د فراه ولایتي شورا غړي او سیمه ییز چارواکي وايي، د دوی معلومات او شواهد ښيي، چې طالبانو ته د ایراني ځواکونو په واسطه پرمختللې روسۍ وسلې رسېدلې دي.
په دې پرمختللو وسلو کې توپونه، توغندي او د شپې د روښنايۍ توکي شامل دي.
د فراه د والي ویاند ناصر مهري وايي، د هغو سندونو پر بنسټ چې د امنیتي ځواکونو لاس ته ورغلي؛ ښيي چې روسیه او ایران د دې ولایت په وروستۍ جګړه کې د طالبانو په ملاتړ ښکېل وو.
د مهري پر وینا، په دې جګړو کې طالبانو له امنیتي ځواکونو نه په پرمختللو وسلو زیاتې ډزې کړي، چې دې ډلې سره د پرمختللو جنګي وسلو او مهماتو ښکارندوي کوي.
د فراه ولایتي شورا رییسه جمیله امیني هم په پرمختللو وسلو د طالبانو سمبالېدل تاییدوي، وايي چې روسیې دا وسلې طالبانو ته د ایران له لارې ور رسولي دي.
د دې په خبره، په فراه کې جنګېدونکیو طالبانو ته د ایران له خوا په دې شرط د اوسېدو اجازه ورکړل شوې، چې د کورنۍ یو غړی به دې ولایت ته د افغان ځواکونو پر ضد جګړې ته لېږي.
خو د فراه امنیه قوماندان توریالی عبدیاني په قوي احتمال په پرمختللو روسي وسلو، لکه ۸۲ ملي متري توپونو او توغندیو د طالبانو سمبالېدل د روسيې کار ګڼي؛ خو زیاتوي، چې تراوسه په کره توګه نه ده څرګنده چې دغه مهمات طالبانو ته چا رسولي دي.
له دې ټولو سره ـ سره، په هرات کې د ایران قونسلګري چې د لویدیځ زون څلورو ولایتونو کې سیاسي استازولي کوي کوي؛ د فراه ولایت چارواکیو دا ادعاوي بې بنسټه بولي.
