اروپايي اتحاديې له افغانستانه د خپل ملاتړ دوام د جمهوریت د ارزښتونو ساتلو پورې مشروط کړی دی.
له ارګه نن دوشنبه په خپره شوې خبرپاڼه کې راغلي چې دا خبره د اروپایي ټولنې د بهرنیو اړیکو او امنیتي پالیسۍ رييس جوزف بوریل له ولسمشر محمد اشرف غني سره په ټیلیفوني اړيکه کې کړې ده.
ارګ د نوموړي له قوله ليکلي چې جوزف بوریل به طالبانو ته دا پيغام رسوي چې له افغانستان سره د دوی راتلونکې مرستې په دې پورې تړلي چې هلته د جمهوريت ارزښتونه خوندي شي.
نوموړي ويلي چې نږدې وخت کې به افغانستان ته ولاړ شي او هلته به له نږدې د جمهوریت له ارزښتونو ملاتړ اعلان کړي.
دا په داسې حال کې ده چې د قطر په دوحه کې د روانې اوونۍ د شنبې په ورځ د بينالافغاني مذاکراتو پرانيستونکې غونډه وشوه.
