د دوحې شېراتون هوټل، د افغان دولت او طالبانو د مخامخ خبرواترو د لومړني پړاو کوربه دی. د دغو مراسمو په څنډو کې د سلګونو موضوعاتو په ډله کې یوه هم د هغې نجلۍ پر لاس «د توتکۍ خالوهنه» ده چې د خبریالانو په ډله کې شېراتون ته تللې ده.
دغې خالوهنې ډېر غبرګونونه له ځانه سره لرل او ډېریو پر ټویټر ستایلې ده. د دغې نجلۍ مخاطبانو ویلي چې هغه د نوي افغانستان په استازولۍ شېراتون ته تللې ده.
محبوبه واحدي وايي، سره له دې چې په قصدي ډول یې له خالوهنې سره ځان د طالبانو مخې ته نه دی راڅرګند کړی، خو غبرګونونه یې خوښ شول. هغه له سلاموطندار سره په مرکه کې د نوي افغانستان په اړه غږېدلې او وايي، طالبان باید له دغسې یوه هېواد او نسل سره ځان جوړ کړي.
شېراتون د قطر د دوحې په شمالي برخه کې یو پنځه ستوریز هوټل دی. دغه هوټل ډېر کله د هغو کورنیو او کسانو کوربه وي چې د فارس خلیج ساحل ته د چکر لپاره ځي، خو دا ځل د دولت او هغې ډلې د پلاویو کوربه دی چې له درې لسیزو ډېر یې یو د بل پر وړاندې وسلې اخیستې دي.
د طالب ډلې په مرکچي پلاوي کې یوه ښځه هم نشته. د دغې ډلې ویاند نعیم وردګ سلاموطندار ته ویلي چې یاده غونډه د سولې او جګړې په اړه ده او اړتیا نشته چې ښځې دې هم پهکې ولري.
د افغان دولت د سولې مرکچي پلاوي غړې حبیبیې سرابي سلاموطندار ته ویلي، د طالبانو په پلاوي کې د ښځو نه موجودیت ښيي چې «د طالبانو په منځ کې ښځې غږ او ځای نه لري.»
د طالب ډلې د سولې مرکچي پلاوي غړی خیرالله خیرخواه وايي، هڅه کوي چې خبرې اترې ښه پایله ولري: «هڅه کوو چې غونډې ښې پایلې ولري، موږ د ښځو پر حقونو او بیان ازادي باور لرو، خو داسې چې چا ته پهکې زیان و نه رسېږي.»
د افغان دولت د سولې مرکچي پلاوي یوه مهمه موضوع د ښځو حقونه دي چې د مصالحې عالي شورا رییس عبدالله عبدالله د سولې خبرواترو د پیل په غونډه کې یې ورته اشاره وکړه.
اوس د دواړو لوریو ترمنځ د تماس ډله جوړه شوې او دا ډله پر اجندا د کار کولو دنده لري.
