په افغانستان کې د فرانسې سفیر فرانسوا ریشه درې ورځې مخکې لښکرګاه ته تللی و. هغه نن مازیګر مهال په یوې خبري غونډې کې وویل، هلمند ته د سفر موخه یې دا وه چې د هلمند امنیتي حالت وګوري او له خلکو سره د امنیتي حالاتو او مرستو په اړه مشورې وکړي.
دا هلمند ولایت ته په تېرو لسو کلونو کې د فرانسې د یو غټ چارواکي لومړی سفر دی.
فرانسوا ریشه چې د هلمند د والي تورنجنرال محمدیاسین سره په ګډې خبري غونډې کې خبرې کولې وویل، اوس د دې وخت رارسېدلی دی چې په افغانستان په خاص ډول هلمند کې د راتلونکیو پارلماني ټاکنو او د سولي په اړه د روانو هلو ـ ځلو ملاتړ وشي.
دی وايي چې اوس له پيسو سره نهدی راغلی؛ خو دا به له هلمندیانو سره د فرانسې هېواد له لوري د ملکي او نظامي مرستو د پیل لومړۍ ارزونه نه وي.
د ده په خبره، په هلمند کې یې له خلکو سره په بېلابېلو موضوعاتو په ځانګړي ډول د روغتیا او پوهنې په برخه کې ډېرې خبرې کړي؛ سملاسي یې د مرستو ژمنه نهشي کولی.
د هلمند والي تورنجنرال محمد یاسین هم پهدې خبري غونډې کې وویل، د نورو پرمختیايي پروژو ترڅنګ يې د امنیت او سولې د ټنګښت په برخه کې له تېرو درېیوو ورځو راهسې د فرانسې د سفیر سره بحثونه کړيدي او ډېر ژر به له هلمند سره د فرانسې له لوري په ځېنو برخو کې ملاتړ ترلاسه کړي.
ویل کېږي فرانسوا ریشه د درېیوو ورځو په موده کې د یوې ورځي لهپاره د نیمروز ولایت مرکز زرنج ته هم تللی و چې له ایران سره د روانې سوداګرۍ او ټرانزیټ ترڅنګ د هغه ولایت پر امنیتي او اقتصادي حالت هم له مسوولانو سره خبرې ـ اترې وکړي.
