جمهور رییس محمداشرف غنینینگ اروپاده قیلگن سفریده آلمان دویچهوله تلویزیونی بیلن اوتکزگن صحبتیده، غورلیک ییگیت قیزنینگ صحرایی محکمه بولیشی، ملی بیرلیک حکومتینی اویَتلنتیردی دیگن.
نیچه پیت آلدین بو ییگیت قیز اویدن قاچیش و نکاحسیز مناسبتلر قوریش عیبیگه قارهلنیب عامه خلق حضوریده شلاقلندی.
اما مملکت بویلب بو بیرینچی یا سونگی صحرایی محکمه بولمهدی. چمهسی ایکی هفته آلدین طالبلر گروهی غزنی ولایتینینگ منگور قیشلاقیده ایکی ییگیتنی نماز اوقیمهگنلیک و اوغیرلیککه عیبلب اهالی حضوریده صحرایی محکمه قیلیب، شلاقلهدیلر. حادثهدن بیر کون اوتمسی مذکور گروه اعضالری بغلانده بیر قوم یاش اولوغینینگ اوغلینی چاغیر ایشیشگه عیبلب شلاقلهدی.
ایکی آی آلدین غور ولایتی مرکزی فیروز کوه شهرینینگ 40 کیلومتر اوزاغلیگیده رخشانه ناملی قیز، طالبلر تامانیدن نکاحسیز مناسبتلر قوریش عیبیگه قارهلنیب محکمه قیلیندی، بو صحرایی محکمه حکمی تاش کومدی جزاسی بولیب، طالبلر و محل یشاوچیلری تامانیدن عملگه آشیریلدی.
طالبلر سونگی کونلرده غور ولایتینینگ دولتیار تومنیده احمد ناملی بیر ییگیتنی تیریکلهی تیریسینی اَیریب، کوزلرینی چیقاریب آلگندن سونگ، جسدینی تاغ اوستیدن یومَلهتیب تشلهدی.
هرحالده، طالبلر تامانیدن عملگه آشیریلهدیگن صحرایی محکمهلردن کوپیسی مذکور گروهگه نسبت بیریلهدی، اما اهالی فکرداشلیگی و یاردمی بولمهگن صورتده، بونقه نا انسانی محکمهلر قوریلیشی قیین و حتی امکانسیزدیر. دیمک بو مسأله اهمیتی بونده دیرکه نیگه هرکون اویتَلنتیریلیشلر تکرار بولهدی؟
بو بارهده سیاسی تحلیلچی لطیف نظرینینگ سلاموطندار بیلن قیلگن صحبتیده ایتیشیچه، دولت حاکمیتی ضعیفلیگی و افغانستانده سنتی فرهنگ و ارزشلر حاکملیگی و قبیلهیی مسالهلر صحرایی محکمه تکرار بولیشیگه سبب بولهدی.
جناب نظریگه کوره، طالبلر اوزکنترولیده بولگن ییرلرده شریعت حکمینی ناتوغری شکلیده ایش آلیب، اوشبو عمل آرقهلی جماعتچیلیک فکرینی چلقینتیریب بوی سوندیریشلریگه حرکت قیلهدی.
جناب نظری، افغانستان یشاوچیلرینینگ سنتی توشینچهلری اوزگرمه گونگه قدر، شونینگدیک صحرایی محکمهلر و اوز خودمچهلیک جزالنتیریشلر دوام ایتیشی ممکن دیب بیلهدی.
افغانستان انسان حقوقی ایرکین کمیسیون باشلیغی سیما سمرنینگ صحرایی محکمهلر بارهسیده ایتیشیچه، قانون حاکم بولمهگنلیگی، اوزاغلشیب قالگن محلهلرده صحرایی محکمهلر عدالتلی بولیب اوتهدیگن محکمهگه توسیق چیقهدی.
خانم سمر حکومتدن اوزاغ ییرده توشیب قالگن محلهلرده بولیب کیلهدیگن صحرایی محکمهلر عاملینی توتیب جزالنتیریلیشلرینی سورهیدی.
عین حالده نمانیدهلر مجلسی نینگ ایچکی امنیت کمیسیون اعضاسی شکیباهاشمینینگ طالبلر تامانیدن عملگه آشیرلهجک صحرایی محکمهلر بارهسیده ایتشیچه، مذکور گروه هیچ قندهی بیر ارزش و اصوللرگه حرمت بیرمسدن اوز کوچلرینی اهالیگه تمثیل قیلیب کورسهتیشی اوچون بونقه عملگه قول اورهدی.
خانم هاشمی اهالینینگ صحرایی محکمهلرده مراجعت قیلیشلری بارهسیده ایتیشیچه، عدلی و قضایی نهادلرده یوکسک فساد بارلیگی سبب بولگن تا قیینچیلیکلری حل ایتیلیشی اوچون طالبلرگه مراجعت قیلیب قضایی جنجاللرنی مذکور گروهگه آلیب بارهدیلر.
شوبیلن بیرگه بیر هفتدن بویان جمهورلیک سراییدن نیگه صحرایی محکمهلر دوام ایتیب بارماقدهلیگی و ملی بیرلیک حکومتیگه اویت کیلتیرگن بارهسیده معلومات آلماقچی بولدیک، اما کیشی صحبت قیلیشگه حاضر بولمهدی.
