د افغانستان د کانونو او پېترولیم وزیر داود شاه صبا د ولسي جرګې په نننۍ) سه شنبې) عمومي غونډه کې وویل، دوی په یو داسې سېستم باندې کار کوي، چې تر راتلونکي کال پورې د کانونو له درکه د راغلو عوایدو په اړه ولس ته حساب ورکړي.
د صبا پر خبره، په پام کې لري، چې د کانونو په برخه کې د عوایدو او د تړونونو په اړه روڼوالی راولي او ولس هم په دې جریان کې له خپلو کارونو خبر کړي.
د کانونو او پېترولیم وزیر دا هم وویل، چې ۱۵ ورځې وروسته ولسمشر غني ترکمنستان ته سفر کوي او د دې سفر په ترڅ کې به پاکستان او هند ته د تېرېدونکې نل لیکې پروژه هم پرانیستل شي.
د ګاز دا نل ليکه به چې تقريبا يو زرو۷سوه ۳۵ کيلومټره اټکل شوې، د ترکمنستان له سترو زیرمو څخه ګڼل کېږي؛ د افغانستان په اقتصاد کې پوره مرسته وکړي .
دا نل لیکه پاکستان ته تر رسېدو مخکې په هرات، فراه، هلمند او کندهار کې تیریږي.
د داود شاه صبا پر وینا، په شبرغان کې د نفتو د رایستلو ماشین بېرته جوړ شوی او د پخوا په پرتله ۳ چنده زیات نفت راوباسي.
د کانونو او پېترولیم وزیر همدارنګه زیاته کړه، چې د امو د نفتو په پراختیايي حوزه کې د ۱۱۰ میلیونو ډالرو پر ارزښت قرادادونه هم شوي، چې د اقتصادي بساینې په برخه کې مثبت ګام ګڼل کېږي.
ده د امنیتي ستونزو په اړه وویل، چې پخوا له ډېرو ستونزو سره مخ وو، ځکه خو به بهرنیو او کورنیو پانګوال، پانګې اچونې ته زړه نه ښه کولو.
د کانونو او پېترولیم د وزیر پر وینا، د امنیت په اړه یې له حکومت سره یوه طرحه شریکه کړې، چې له مخې به یې ټول امنیتي ارګانونه مسول وي، چې د کانونو د قاچاق او خپل سرې را ایستنې مخنیوی وکړي.
د ده پر خبره، حکومت یې دا طرحه منلې او د دې له پاره یې یوه کومېټه جوړه کړې، چې مشرتوب یې د کورنیو چارو وزیر انورالحق علومي ته ورتر غاړې ده او هغه ژمنه ورکړې، چې ډېر ژر به پر دغې طرحې کار شروع کړي او د کانونو د خوندیتوب موضوع به حل شي.
صبا وویل، چې په راتلونکو ۱۵ ورځو کې به د کانونو بهرني قراردادیان راشي او د وزیرانو شورا له تصویب نه وروسته به په کار پیل وکړي.
ده د وړو کانونو په اړه وویل، داسې کړنلاره یې جوړه کړې، چې ټول افغان پانګوال وکولای شي، چې په وړو کانونو کې پانګونه وکړي.
د داود شا صبا پر خبره، پخوا به د کانونو عواید په درې برخو کې راټولېدل، خو وروسته له دې به د ښه شفافیت له پاره په یو ځای کې راټولېږي.
د کانونو او پېترولیم وزیر وویل، هڅه کوي، چې په راتلونکو ۵ کلونو کې هڅه کوي، چې په افغانستان کې ټولې نفتي سیمې تشخیص کړي.
