د کلیو پراختیا او بیارغونې وزیر مجیبالرحمان کریمي د یوې خبري غونډې په ترڅ کې د پنځو ولایتونو د پور ورکولو ټولنو سره څه باندې ۱۰۰ میلیونه افغانۍ مرسته وکړه.
مرسته شوې پیسې ۱۰۲ میلیونه افغانۍ دي چې د ننګرهار، هرات، بامیان، بلخ او پروان ولایتونو د پور ورکولو ۳۳۷ ټولنو ته ورکړل شوې دي.
د کلیو پراختیا او بیارغونې وزیر مجیبالرحمان کریمي د دغې مرستې موخه د خلکو لهپاره کاري فرصتونو برابرول، کلیو کې د کاري ظرفیتونو لوړول، د کلیوالي تولیداتو پرمختګ او له ښاري بازارونو سره د کلیوالي سوداګریو نښول بولي.
ښاغلی کریمي وايي، دغه مرستې به شاوخوا ۴ زرو کسانو ته په مستقیم او څه باندې ۱۲ زرو تنو ته په دایمي توګه کاري فرصتونه برابر کړي چې لاسي صنایع، د موادو پروسس، دوکانداري، غالۍ اوبدل او کرنیزې چارې په کې شاملې دي.
کریمي وايي، په دغه پروګرام کې د ښځو ونډه ۶۵ سلنه ده او ټاکل شوې دغه پروګرام راتلونکیو میاشتو کې په مرحلهيي ډول ټولو ولایتونو کې پیل شي.
بامیانو ولایت کې د تمدن ټولنې مشره نظیفه فدايي، چې د دغو مرستو له جملې یې ۲۳۰ زره افغانۍ ترلاسه کړې وايي، کلی یې له ډېرو ستونزو سره لاس او ګرېوان دی چې اوس د دغې ټولنې ښځې به په مرسته شویو پیسو سره وکولی شي خپل کاروبار وغوړوي.
د کلیو پراختیا او بیا رغونې وزارت د کلیوالي صنایع پراختیا پروګرام له لارې تراوسه د پور ورکولو او سپما ۴۶۹ ټولنې رامنځ ته کړي او ورسره یې څه باندې ۲۴۸ میلیونه افغانۍ مرسته کړې ده.
د دې وزارت مسوولان وايي، هغوی له دغه پروګرامه په ګټې اخیستو توانېدلي د کلیو ۷۳۹۰ ښځو او نارینهوو ته په مستقیم او شاوخوا ۲۲ زرو نورو ته په غیرمستقیم ډول دایمي کاري زمینې برابرې کړي.
