د نيمروز ولايت سيمهييز مسوولان وايي، ايران د سرحدي بازارونو له لارې افغانستان ته خپل سوداګريز توکي په قاچاقي توګه واردوي.
د ياد ولايت والي سیدولي سلطان وايي، وروسته له هغې چې سرحدي بازارونه وتړل شول له څه مودې راهيسې ايران له دې ولايت سره په ګډه پوله کې « ګمشاد او ګلدان» ناامنه سيمو کې چې د طالبانو تر کنټرول لاندې دي خپل توکي افغانستان ته په قاچاقي توګه لېږدوي.
د نوموړي په وينا، ډېری توکي چې له ايرانه په قاچاقي توګه واردېږي تاريخ يې تېر شوی دی.
د نيمروز والي زياتوي، په ځلونو يې له ايرانه غوښتي چې خپل سوداګريز توکي په قانوني بڼه او د ګمرک له لارې افغانستان ته ولېږدوي؛ خو دې هېواد يې غوښتنو ته هېڅ پام نه دی کړی.
نوموړی وايي، څو کاله وړاندې د نيمروز د ولايتي ادارې د چارواکيو او د ايران د سيستان او بلوچستان ترمنځ هوکړه لاسليک شوه چې هره ورځ به شاوخوا ۲۰۰ موټره سوداګريز توکي له ګمرکي محصول پرته تېرېږي راتېريږي.
د نيمروز د والي سیدولي سلطان په وينا، دوی چې کله وليدل ايران له دې هوکړې يوه اړخيزه ګټه اخلي نو دا هوکړه يې لغوه کړه.
د ياد ولايت د ولايتي شورا مرستيال گلاحمد احمدي هم وايي چې د يادو توکيو د قاچاق دوام د هېواد اقتصاد ته زيان رسوي.
په دې اړه مو په کابل کې د ايران د سفارت نظر ترلاسه نه شو کړی.
د نيمروز د سيمهييزو مسوولانو په وينا، دا ولايت له ايران سره ۲۳۶ کیلومټره ګډه پوله لري چې ۸۵ کيلومټره يې بېخي پرانيستې ده.
دوی وايي، څه موده وړاندې په سرحدي سيمو کې د عملياتو په پايله کې ۵ د سوداګريزو توکيو موټر چې په قاچاقي توګه له ايرانه افغانستان ته واردېدل، ونيول شول.
