هرات ولایتیده ایشانچلی امنیتی منبعلردن بیرینینگ ایتیشیچه، پنجشنبه دن جمعه گه اوتر کیچه شیندند تومنینینگ قلعۀدختر قیشلاغیده چشمه قرارگاهی اوستیگه طالبلر تامانیدن اویوشتیریلگن هجوم نتیجهسیده امنیتی کوچلردن 14 تهسی هلاک و باشقه 20 تهسی درکسیز یوقالگن.
شیندند تومنیده قوم بویوکلریدن بیری تورمحمد ظریفینینگ سلاموطندارگه ایتیشیچه، قوراللی طالبلر مذکور قرارگاه نی باسیب آلگنیدن سونگ، 22 عسکرنی اسیر آلگن و منطقهده 5 عسکرنینگ جسدی کورینگن.
اوشبو قوم بویوکی گه کوره، مذکور قرارگاه ده 50 امنیتی عسکر بار ایکن.
جناب ظریفینینگ ایتیشیچه، قوراللی طالبلر مذکور قرارگاه نی برچه جهازلرینی ایرتهلبگچه اوزلری بیلن آلیب کیتگن، بیراق حاضرگچه منطقه گه یاردمچی کوچ ییتیشمهگن.
هرات حاکمی سوزلاوچیسی جیلانی فرهاد، بو واقعهنی تصدیقلیدی، بیراق قربانلیک رقمی توغریسیده هیچ نرسه دیمهیدی.
اونگه کوره، منطقه گه امنیتی کوچلر یوباریلگن و تیکشیروولر اوتکزیلگنیدن سونگ، معلومات ترقهتیلهدی.
طالبان گروهی سوزلاوچیلریدن بیری قاری یوسف احمدینینگ ایتیشیچه، چشمه قرارگاهی اوستیگه اویوشتیریلگن هجومده قطار عسکرلر هلاک ایتیلگن و باشقه 20 تهسی اسیر آلینگن. او، بو آتیشمهده قوراللی طالبلرنینگ قربانلیگی توغریسیده هیچ نرسه دیمهیدی.
