جمهور رییس بیرینچی اورین باسری جنرال عبدالرشید دوستمنینگ سوزلاووچیسی سلطان فیضینینگ سلام وطندارگه ایتیشیچه، دوشنبه کون جناب دوستم ایکی اوغلی بیلن حربی کییم کییب، امنیتی کوچلر یانیده طالبلر بیلن بولهدیگن اوروش میدانیده حضور تاپکن.
جناب فیضینینگ ایتیشیچه، یکشنبه کیچه، جنرال دوستم امنیتی کوچلر یانیده، طالبلر مرکزینی باسیب آلیشگه بویروغ بیریب ایرتلبگچه نیچه منطقه، جملهدن چیت ایللیک جنگریلر و طالبلر تامانیدن ناملنگن والینینگ قرارگاهسی المار تومنی میرشادی و تربت قیشلاقلرینی طالبلردن تازهلگن.
جناب فیضینینگ ایتیشیچه، عملیات نتیجهسیده، طالبلر تامانیدن ناملنگن سابق والینینگ ایناغهسی توتقونگه آلینگن و طالبلر والیسی اصلی قرارگاهسی امنیتیکوچلر قولیگه توشگن.
اونینگ کوپیتیریشیچه، حاضر امنیتیکوچلر عملیاتی جناب دوستم رهبرلیگیده قیصار و المار تومنلریده دوام ایتماقده.
جناب فیضی، حاضرگچه بو عملیات نتیجهسیده، بیر طالب هلاک بولگن و باشقه 8 تهسی یرهلنگن دیگن.
فیضیگه کوره، بو عملیاتده جناب دوستمنینگ حربی تعلیم کورگن ایکی اوغلی، آتهسیگه یولداشلیک قیلهدی.
اونینگ ایتیشیچه، جنرال دوستم طالبلردن تازهلنگن منطقه یشاوچیلریگه، ییگولیک آوقت ترقتکن.
جناب دوستم نیچه هفته آلدین شمالگه باریب، جنگری طالبلرنی اوز قوراللرینی ییرگه قوییب و عادی حیاتلریگه دوام بیریشینی سورهگن ایدی.
بلخ امنیه قوماندانی، مذکور ولایتده طالبلر فعالیتی شدتلنگنی توغریسیده خواطر بیلدیردی
بلخ ولایتی امنیتی رسمیلری، مذکور ولایت ایریم منطقهلریده ینگی امنیتی تهدیدلردن خبر بیرهدی. اولرنینگ ایتیشیچه، مملکتدهگی سونگی ناتینچلیکلر بلخ اوستیگههم تاثیر تشلهگن.
دوشنبه کون، بلخ امنیه قوماندانی سیدکمال ساداتنینگ مزارشریف شهریده بیر خبری ییغینده ایتیشیچه، شمالی ولایتلردهگی سونگی ناتینچلیکلر، بلخ ولایتیده عصیانچیلر فعالیتی کوپهییشیگه سبب بولگن.
او، بلخ ولایتی چمتال، شولگره، دولتآباد و چهاربولک تومنلری ایریم بولیملریده ینگی طالبلر حضوریدن خبر بیرهدی.
عین حالده، جناب ساداتنینگ ایتیشیچه، دولت عصیانچیلرنی یوقاتیش خصوصیده، جدی صورتده سعی و حرکت قیلماقده.
ساداتنینگ کوپهیتیریشیچه، قوراللی طالبلر گروهی اوتکن کیچه، بلخ ولایتی خلم تومنیده امنیتی پوسته اوستیگه هجوم اویوشتیرگن و اوشبو هجوم امنیتی کوچلر تامانیدن تورت هجومچی اولیشی بیلن یکونلنگن.
اونینگ ایتیشیچه، بو هجوم خلم تومنی بیلن قندوز ولایتی چیگرهسیده یوزبیرگن.
کابلده یوزبیرگن سونگی پارتلش هجوملر و شمالده طالبلر فعالیتی شدتلنگنی، بلخ امنیتی رسمیلرینینگ اویغاتکن و امنیتی تیکشیرولرینی شدتلنتیریشیگه سبب بولگن و مزار شهریگه کیرهدیگن موترلرنی جدی صورتده تیکشیریلهدی.
