افغانستان ملی بیرلیک حکومت اجراییه باشلیغی داکتر عبدالله عبدالله رهبرلیگیده بولگن برقرارلیک و یقینلیک سیلاو تیمی نینگ ییریک اعضاسی و نظارتچیلری نینگ بیر کون آلدین ادعا قیلیشیچه، پولیس تشکیلاتی نینگ خاص کوچلری، سیلاو کمیسیونی نینگ دبیرخانه ادارهسینی همکارلیگی بیلن دیجیتالی نتیجهلرنی تیکشیریش و توپلش مرکزنینگ قفلینی سیندیریب ایچکری کیریشگن.
بوگون «سهشنبه» سیلاو کمیسیونی خبری بیر ییغین اوتکزیب اعلان قیلیشیچه، مذکور کمیسیون نینگ تعلیمات مرکزی بناسی نینگ کیریش ایشیگینی قفلی دبیرخانه ادارهسینی خوفسیزلیک مصلحتچیسی نینگ بویروغی بیلن سیندیریلگن و اوندن کیین پولیس تشکیلاتی نینگ ایکی خاص عسکری اوزلرینی ایسیتیش اوچون بنانینگ دهلیزی گه کیریشگن.
سیلاو ایرکین کمیسیونی اعضاسی اورنگ زیب نینگ ایتیشیچه، بایومتریک اسکونهلریگه هیچ بیر زیان ییتمهگن و کمیسیون بناسی نینگ بیرینچی دهلیزی گه پولیس تشکیلاتینینگ ایکی خاص عسکری قندهی قیلیب کیرگنی تیکشیریلیشی اوچون بیر هیأت تعیین ایتیلگن.
بیراق، سیلاودن نظارت قیلووچی ادارهلرنینگ ایتیشیچه، دیجیتالی نتیجهلرنی تیکشیریش و توپلش مرکزنینگ قفلی سیندیریلگنی توغریسیده سیلاو کمیسیونی تامانیدن بیریلگن معلومات ییترلی ایمس و بو توغریده کوپراق معلومات بیریلیشی کیرهک.
افغانستان بوییچه ایرکین و عدالتلی سیلاو بنیادی یا-ده فیفا باشلیغی یوسف رشیدنینگ ایتیشیچه، یکشنبه کیچه سیلاو کمیسیونیده یوز بیرگن واقعه آچیقلنمهگن و بو ادارهنینگ نظارتچیلری گه ساحهنی کوریش اوچون رخصت بیریلمهگن.
جناب رشیدنینگ ایتیشیچه، سیلاو ایرکین کمیسیونی و سیلاو تیملرینینگ نظارتچیلرینی ادعالری فرقلی دیر و سیلاو کمیسیونی مسلکی و قانونی شکلده اهالی و نظارتچی ادارهلرنینگ بو چیگللیکدن چیقاریشی کیرهک.
افغانستان بوییچه شفاف سیلاو بنیادی یا-ده تیفا سوزلاوچیسی زبیر حبیبزاده نینگ ایتیشیچه، سیلاو کمیسیونلری نینگ مدیریتی کوچسیزلیگی و باشقه تاماندن دیجیتالی نتیجهلرنی تیکشیریش و توپلش مرکزنینگ قفلی سیندیریلگنی توغریسیده بولگن شایعهلر اهالی و سیلاودن نظارت قیلووچی ادارهلرنی خواطرگه سالگن.
اوتگن کون «دوشنبه» برقرارلیک و یقینلیک سیلاو تیمینی باشلیغی علیاحمد عثمانی نینگ خبری بیر ییغینده ایتیشیچه، دیجیتالی نتیجهلرنی تیکشیریش و توپلش مرکزی گه هجوم قیلیش یشاوچیلرنینگ آوازی و سیلاو شفافیتی گه زیان ییتکیزگن و بو مسئله جدی شکلده تیکشیریلیشی کیرهک.
