جمهورلیک ریاست سیلاوی یولگه قوییلیشی اوچون تورت کون قالگن، بیراق مملکت تومنلریدن بیرقطاری جدی تهدیدگه روپهره بولیب تورگن و بو تومنلردن بیرقطاریده هیچ بیر آواز بیریش مرکز یوق دیر.
بیرقطار امنیتی و محلی منبعلرنینگ کیملیگی سیرقالیشنی ایستهب سلاموطندارگه ایتیشیچه، سیلاو کونیده آواز بیریش مرکزلر خوفسیزلیگینی تامین قیلیش خصوصیده حکومت دقت قیلمهگن صورتده، اهالی سیلاوگه اشتراک قیلمهیدی.
بغلان ولایتیدن بیر منبع نینگ سلاموطندارگه ایتیشیچه، اوشبو ولایت امنیتی وضعیتی کون اوتیش بیلن یمان بولماقده و گاهگاهی پلخمری شهری اطرافیده امنیتی کوچلر و طالبان گروهی آرهسیده آتیشمه یوز بیرهدی.
منبع نینگ ایتیشیچه، امنیتی کوچلر یالغیز بغلان مرکزی پلخمری شهری و بو ولایت قتناو یوللریده فعالیت قیلهدی و باشقه بولیملر ایسه طالبان نظارتیگه دیر.
طالبان گروهی پروان، پنجشیر و کاپیسا ولایتلری نینگ بیرقطار تومنلریده فعالیت قیلهدی. پروان حاکمی فضلالدین عیارنینگ ایتیشیچه، عصیانچیلیک گروهلر هیچقندی فرصتدن قول تارتمهیدی و تومنلرنی ناتینچ قیلیش اوچون هردایم سعی و حرکت قیلهدی.
جناب عیارنینگ کوپهیتیریشیچه، جمهورلیک ریاستی سیلاوی کونیده تیارگرلیک آلینگن، بیراق محل یشاوچیلرینی امنیتی کوچلرگه یاردم بیریشلری کیرهک.
بلخ امنیتی وضعیتی هم خواطرلنترووچی دیر. اوشبو ولایت یشاوچیلری محلی حکومت و امنیتی مقاملردن سیلاو امنیتینی تامینلشینی سورهگنلر.
بلخ مدنی فعاللریدن بیری عبدالقادر مصباح نینگ ایتیشیچه، سونگی کونلرده اوشبو ولایت سیاسی معاملهگه اوزگرگن و بو موضوع ناتینچلیک کوپهیشیگه سبب بولگن.
سمنگان ولایتی نینگ امنیتی وضعیتی هم کون اوتیش بیلن یمان بولیب بارماقده.
سمنگان ولایتی کینگش اورین باسری محمدهاشم سروری نینگ ایتیشیچه، طالبان گروهی ایبک شهری اطرافی و باشقه 6 تومنده کینگ شکلده فعالیت قیلهدی. اونینگ ایتیشیچه، طالبان گروهی سیلاو کونیده هجوم قیلیش اوچون تیارگرلیک آلماقده.
شونینگدیک، فاریاب ولایتی کینگش اعضاسی آقمحمد نوری نینگ ایتیشیچه، حاضرده اوشبو ولایت 8 تومنی جدی تهدیدلر بیلن روپهره دیر. اونینگ کوپهیتیریشیچه، بو ولایتده امنیتی وضعیت خواطرلنترووچی دیر و وضعیت بوندهی دوام قیلگن صورتده، اهالی سیلاوگه اشتراک قیلمهیدی.
قندوز ولایتیده مدنی جماعه فعاللریدن بیری عنایتالله خلیق نینگ ایتیشیچه، بو ولایتده امنیتی وضعیت خواطرلنترووچی دیر و سیلاو کونیده ناتینچلیکلر کوپهیشی ممکن. اونینگ ایتیشیچه، اوشبو ولایت نینگ تومنلری و ناتینچ منطقهلریده تازهلش عملیات یولگه قویلیشی جدی نیازلردن دیر.
هلمند ولایتی هم ناتینچ ولایتلردن بیری سنلهدی، بیراق مذکور ولایتده بولگن منبعلرنینگ ایتیشیچه، اوتگن ییللرگه نسبتن بو ولایت نینگ امنیتی وضعیتی یخشی بولگن.
مدنی فعال عبدالحق زواکمن نینگ ایتیشیچه، سونگی پیتلرده هلمند ولایتی نینگ امنیتی وضعیتی یخشی بولگن، بیراق سیلاو یقین بولگنی باعث، اهالی بو خصوصده خواطرلنهدی.
شونینگدیک، فراه تومنلریدن بیرقطاری هم ناتینچ بولگن. فراه ولایت کینگشی اورین باسری شاهمحمود نعیمی نینگ ایتیشیچه، بو ولایتده سونگی عملیاتلر نتیجهسیده وضعیت یخشی بولگن، بیراق تورت تومن بوتونلهی طالبان گروهی نینگ نظارتی ده دیر.
بونینگ یانیده، دایکندی تومنلریدن هم بیرقطاری بیر آز ناتینچ دیر و طالبان گروهی ایریم پیتلر بو تومنلرنی اوستیگه هجوم قیلهدی.
دایکندی ولایت کینگشی اعضاسی غیرت علی جواهری نینگ ایتیشیچه، کجران، پاتو، ناوه، میش و اشترلی تومنلری طالبان گروهی و باشقه قوراللی گروهلرگه گواه دیر. جناب جواهری گه کوره، حاضر 7 آواز بیریش مرکزی جدی امنیتی تهدیدگه روپهره بولیب تورگن.
هرات محلی رسمیلری نینگ ایتیشیچه، اوشبو ولایتده اوتکزیلگن حربی عملیاتلر نتیجهسیده امنیتی وضعیت یخشی بولگن، بیراق حاضرگهقدر شیندند تومنی، گلران و کشک رباطسنگی تومنلری نینگ اوزاق منطقهلریده موجود دیر.
شونینگدیک، بادغیس ولایت کینگشی اعضاسی فرید اخیزی نینگ ایتیشیچه، مذکور ولایت نینگ امنیتی وضعیتی بوتونلهی خواطرلی دیر. اونگه کوره، بالامرغاب و جوند تومنلری بوتونلهی طالبان نینگ قولیده بولگن و قادس، مقر و آبکمری تومنلری هم امنیتی تهدیدلرگه روپهره بولیب توریشگن.
لوگرده هم اوزاق مدتدن بویان ناتینچلیک حاکم بولگن، بیراق مذکور ولایتدن قطار محلی منبعلرنینگ ایتیشیچه، سونگی عملیاتلر نتیجهسیده امنیتی وضعیت بیر آز یخشی بولگن. لوگر پولیس قومندانی رحمخدا مخلص نینگ ایتیشیچه، سونگی پیتلر مذکور ولایتده عملیاتلر شدتلنگن و اوتگن ییللرگه نسبتن امنیتی وضعیت یخشیلشگن. جناب مخلص گه کوره، مرکز شامل برچه تومنلرده حربی عملیات دوام ایتماقده و هر کون طالبان گروهی آغیر قربانلیک بیرهدی.
شونینگدیک، خوست، قندهار و زابل امنیتی رسمیلری نینگ ایتیشیچه، بو ولایتلرده باشقه زمان گه نسبتن امنیتی وضعیت یخشیلشگن و یشاوچیلری تینچلیکده آواز بیره آلهدی.
اوشبو گزارشده سیلاو ایرکین کمیسیونی نینگ فکرینی اورگهنیش اوچون علاقه قوردیک، بیراق کیین مه کیین سعی و حرکت نتیجهسیده مؤفق بولمهدیک.
