.jpg)
سیلاولر شکایت‌لریگه تینگلش کمیسیونی‌نینگ ایتیشیچه، سیلاولر کمپاینی‌نینگ زمانی کیلمس‌دن نماینده‌لر کینگشی نامزدلریدن بیرقطاری، کینگ شکلده کمپاین قیلماقده‌لر و بو جریان تیزلیک‌که توخته‌تیلیشی کیره‌ک. نماینده‌لر کینگشی و تومن‌لر کینگشی نامزدلریدن بیرقطاری، سونگی کونلرده کمپاین زمانی باشله‌نیشیدن آلدین، اجتماعی ترماقلرده صورت‌لرینی ترقتگن و شهرنینگ کوپینچه منطقه‌لری اولرنینگ صورت‌لریدن تولگن.
بوگون «دوشنبه» کابل‌ده خبری بیر ییغینده نطق سوزله‌گن سیلاولر شکایت‌لریگه تینگلش کمیسیونی‌نینگ سوزلاوچیسی و کاتبی علی‌رضا روحانی‌نینگ ایتیشیچه، نماینده‌لر کینگشی نامزدلری‌نینگ صورت‌لری اوزلری یا-ده طرفدارلری تامانیدن هر قنده‌ی بهانه بیلن ترقه‌تیلیشی قانون گه قرشی دیر و بو جریان اوستیدن تیرگاو اوتکزیلیشی لازم.
شونینگدیک، جناب روحانی، دولت ملازملریدن نماینده‌لر کینگشی نامزدلری بیلن بولگن همکارلیک‌لریدن قول تارتیش‌لرینی سوره‌دی.
جناب روحانی‌نینگ کوپه‌یتیریشیچه، سیلاولر کمپاینی‌نینگ زمانی کیلمس‌دن آلدین، مذکور اداره‌نینگ ولایتی و مرکزی دفترلری سیلاولر شکایت‌لرینی تینگلب، تیکشیریب و رویخط‌گه آلیش اوچون تیار دیر.
.jpg)
سلام‌وطندارگه صحبت بیرگن فیفا اجراییه باشلیغی یوسف رشیدنینگ ایتیشیچه، سیلاولر شکایت‌لریگه تینگلش کمیسیونی سیلاولر کمپاینی توغریسیده بولگن لایحه‌نی کیچ نشر قیلگن و بو لایحه نماینده‌لر کینگشی نامزدلری‌نینگ سونگی رویخطی اعلان ایتیلگنیدن سونگ، نشر ایتیلیشی لازم ایدی.
جناب رشیدنینگ کوپه‌یتیریشیچه، سیلاولر کمپاین‌لری‌نینگ جریانی توغریسیده نامزدلرنینگ بیلیمی آز دیر و سیلاولر کمیسیون‌لری دواملی شکلده اولرگه لایحه توغریسیده معلومات بیریشی کیره‌ک.
سیلاولر تقویمی اساسیده، نماینده‌لر کینگشی سیلاوی‌نینگ نامزدلری‌نی سیلاو کمپاین‌لری 6- میزان دن باشله‌نیب و 25- میزان گچه دوام ایته‌دی.
