هرات ولایتینینگ دولتی ادارهلری و یشاوچیلریدن بیرقطاری، مذکور ولایتنینگ سوو ییتکزیش ریاستیدن 200 میلیون افغانیدن آرتیق پول قرضدار بولگن.
هرات ولایتینینگ غرب زونی کانالزاسیون و سوو ییتکزیش ادارهسینی باشلیغی راتب همیم نینگ ایتیشیچه، اوشبو رقم جملهسیدن 156 میلیون افغانی اولتیریش اویلرگه تیگیشلی، 34 میلیون افغانی دولتی ادارهلرگه و باشقه 18 میلیون افغانی مسجدلر و مدرسهلرگه تیگیشلی بولهدی.
جناب همیم گه کوره، سوو خرجتیدن قرضدار بولگنلرنینگ رویخطی هرات ولایت مقامی و قماقخانهسی شامل 21 دولتی اداره دن عبارت بولهدی.
هرات ولایتینینگ غرب زونی کانالزاسیون و سوو ییتکزیش ادارهسینی باشلیغینینگ ایتیشیچه، یشاوچیلر و محلی ادارهلر سوو پولینی تیزلیکده توللمهگن صورتده، سوو ییتکزیش جریانی قیینچیلیککه روپهره بولیشی ممکن.
شونینگدیک، هرات ولایتینینگ مدنی فعاللری و ولایتی کینگش اعضالرینینگ اورغولشیچه، حکومت دولتی ادارهلرنینگ برقی و سووی اوچون خاص بودجه توللیدی و بو ادارهلر سوو ییتکزیش ترماغی رواجلنیشی اوچون قرضلرینی توللهشی کیرهک.
هرات ولایت کینگشینی اعضاسی وکیلاحمد کرخینینگ ایتیشیچه، دولتی ادارهلر یشاوچیلر اوچون اورنک بولیشی لازم. «بو ادارهلر سوو پولینی برچهدن آلدین توللهشی کیرهک»
هرات حاکمی سوزلاوچیسی جیلانی فرهادنینگ ایتیشیچه، وزیرلیکلر ولایتلرده ایکینچی واحدلرنینگ سوو پولی توللهنیشی توغریسیده مشخص مبلغنی نظرگه آلمهیدی و شو یوزهدن، دولتی ادارهلر هم سوو پولینی تولله آلمهیدی.
اونگه کوره، محلی اداره کیلهجک ییل رواجلنتیریش بودجهسیده ادارهلرنینگ برقی و پولی اوچون مشخص مبلغ کیریتیلیشی توغریسیده سعی و حرکت قیلهدی.
غرب زونیدهگی سوو ییتکزیش ادارهسی، حاضر هرات ولایتیده کمیده 70 مینگ مشتری گه سوو ییتکزیب بیرهدی.
