خوست ولایتینینگ مدنی فعاللری و یشاوچیلرینینگ ایتیشیچه، اوشبو ولایتده آست قوریلمه پروژهلر جوده صفتسیز قوریلهدی و بیر آز مدتدن سونگ ایشدن چیقهدی. اولرنینگ ایتیشیچه، اوشبو ولایت نمایندهلری و فعاللریدن بیرقطاری، منفعتلری بولمهگن پروژهلردهگی فساد دن گزارش بیرهدیلر.
اولرگه کوره، اوشبو ولایتنینگ هوا میدانی، متچینی کوپریکی و آغاچ سقلاوچی بنا قوریلیشیده بیفرق یاندهشیلگن و بو پروژهلر صفتسیز قوریلگن.
خوست ولایت کینگشی باشلیغی کفیل ریحان، ولایت حاکمینی پروژهلردن نظارت قیلیش خصوصیده، بیفرق یاندهشیشگه عیبلهیدی. جناب ریحان گه کوره، ولایت مقامی منفعتی بولگن پروژهلرگه موافقت بیلدیرهدی.
بیراق، خوستده فعال خصوصی شرکتلردن بیرینی مسؤولی حمیداللهنینگ ایتیشیچه، پروژهلر قولمه قول بولگنی باعث، صفتسیز قوریلهدی. اونگه کوره، بو قیینچیلیک تیزلیکده حل بولیشی خصوصیده سعی و حرکت قیلینماقده، لیکن «اساسی قیینچیلیک خوست پروژهلری باشکینتده ایریم شرکتلرگه بیریلیشیده دیر.»
عین حالده، خوست حاکمی اورین باسری شیرپادشاه ارگونی، پروژهلرده ولایت مقامی قولی بارلیگینی رد قیلیب ایتیشیچه، اولر ولایت پروژهلری یخشی بیر شکلده قوریلیشی خصوصیده، سعی و حرکت قیلهدیلر.
افغانستان ولایتلرینینگ درجه بندلیگیده خوست اوچینچی درجهده توختهیدی و اوشبو ولایت رسمیلرینینگ ایتیشیچه، ولایت درجه بندلیگی اساسیده، اولرنینگ اختیاریده بیریلگن منبعلر، مذکور ولایت یشاوچیلرینینگ نیازلریگه جواب بیره آلمهیدی و بو ولایتگه ایلگریدن کوره کوپراق دقت قیلینیشی لازم.
