د ثبات او همپالنې او د ملي جنبش مهم غړي وايي، د دغه ټیم رهبرانو او غړیو ته د ارګ له لوري شوي وړاندیزونه رد شوي دي.
د دوی په خبره، تر هغه چې د ټاکنو پایلې باطلې اعلان نه شي، هېڅ ډول هوکړه به ونه کړي.
د ملي جنبش ګوند ویاند بشیراحمد تهینج وايي، داسې یوه طرحه چې د ټولشموله حکومت د رهبرۍ ټول نظریات پهکې ځای شوي وي، وړاندې کوي چې له مخې یې مشارکتي حکومت جوړ شي.
د نوموړي په وینا، د روسیې، چین، ایران، ترکیې، پاکستان او منځنۍ اسیا هېوادونو په ګډون د سیمې ټول قدرتونه په افغانستان کې ټولشموله حکومت غواړي.
هغه ټینګار کوي چې د ثبات او همپالنې ټیم ته د ارګ وړاندیزونه رد شوي دي.
د ثبات او همپالنې ټیم یو بل غړی فضلاحمد معنوي هم په یوه ټویټ کې لیکلي چې د کودتايي رایو له باطلولو پرته هېڅ هوکړه نه کېږي او د ثبات او همپالنې ټیم ګډه پرېکړه پر خپل ځای ده.
بلهخوا د ګلبدین حکمتیار په مشري حزب اسلامي د یوې خبرپاڼې په خپرولو سره پر امریکا تور پورې کړی چې د ملي یووالي حکومت په څېر د یوه بل سهامي شرکت د جوړولو هڅه کوي.
په خبرپاڼه کې لیکل شوي چې امریکا د مصالحې شورا په نوم هڅه کوي د ارګ او سپېدار ترمنځ واک ووېشي.
دا په داسې حال کې ده چې امریکا وايي، په افغانستان کې د جګړې ختمولو لپاره د افغانانو ترمنځ د خبرو اترو پيلولو لپاره د اسانتیاوو پر برابرولو کار کوي.
ومو غوښتل چې په دې اړه د ولسمشرۍ ماڼۍ نظر هم واخلو، خو له پرلهپسې هڅو سره سره بریالي نه شوو.
