اوزاق مدتدن بویان کابل شهردارلیگی ایشچیلریدن بیرقطاری، شهردارلیک اطرافیدهگی یوللرده تیلنچیلیک بیلن شغللنهدی. کونده اداری ایش یکونلنگنیدن سونگ سَریغ کییملیلر رسمی کییم و قوللریدهگی اسکونهلری بیلن، شهرنی گاوجوم ییرلریده تیلنچیلیک قیلهدی.
سریغ کییملیلرنینگ بو ایشی برچهگه عیان دیر؛ برچهمیز بیلهمیز، آز آیلیک و قشاقلیککه حیات کیچیریش جودههم قیین توشهدی و بیرقطارلرنینگ غرورینی ایاق آستیگه قیلیب تیلنچیلیک قیلیشیگه سبب بولهدی. بیراق بیزلر اوچون اهمیتلی بولگن نرسه، کابل شهردارلیگی ایشچیلرینینگ تیلنچیلیگی، دولتنینگ دقت سیزلیگی و بو وضعیت خلق اوستیگه سلبی تأثیر تشلهشی ایدی، دیمک دولت حاضرگهقدر اوشبو اقتصادی و اجتماعی قیینچیلیکلرنی حل ایتیشگه چاره تدبیر کورگن می؟
کابل شهردارلیگی مطبوعات مسؤولی عبدالقادر آرزو، سَریغ کییملیلرنینگ تیلنچیلیگینی تصدیقلهیدی؛ بیراق شهردارلیک ایشچیلرینینگ حاضرگی شرایطده مسؤول بولمهگنینی ایتدی. جناب آرزونینگ ایتیشیچه، حاضرگی شرایطدهگی اقتصادی وضعیتده کونسایین ییمک و کییم قیمتی یوقاری کیتماقده، شوندهی حالده، شهردارلیک ایشچیلرینینگ آیلیگی بیش یریم مینگ افغانی دیر، بوندن آرتیق نیمه بولیشی لازم.
جناب آرزو، ملی بیرلیک حکومت وزیرلیکلریده مصلحتچیلرنینگ آیلیگی یوقاری بولگنیدن تنقیدقیلیب ایتیشیچه، آیلیکلر خصوصیدهگی نابرابرلیک و عدالتسیزلیک بیزلرنی بو نتیجهگه ییتیشتیرگن و سَریغ کییملیلر توغریسیده دولت دقت قیلمهیدی.
بیراق، یشش محیط ایش بیلرمانی کاظم همایوننینگ، کابل شهردارلیگی بیرقطار ایشچیلرینینگ تیلنچیلیگی توغریسیده سلام وطندارگه ایتیشیچه، بیرقطار کیشیلر شهردارلیکنینگ سَریغ کییمیدن ناقانونی صورتده فایدهلنهدی. اونینگ ایتیشیچه، قطار کیشیلر بیلهدی کیم، خلق شهردارلیک ایشچیلریگه حرمت قایل بولهدی، شونینگدیک اولر شهردارلیک کییمیدن ایش آلیب، تیلنچیلیککه قول اوریب پول تاپهدیلر.
عین حالده، بیرقطار دولت رسمیلری بیلن سَریغ کییملیلرنینگ تیلنچیلیگی و دولتنی دقتسیزلیگی توغریسیده صحبت اوتکزدیک، بیراق کورینیشیچه، کیمسه بوندهی بیر وضعیتنی قبول ایتمهیدی. گویا، دولت طبیعی شکلده ایشانچینی قولدن بیرگن و شهردارلیک ایشچیلرینینگ تیلنچیلیگی بو قیینچیلیککه باغلیق بولمهیدی.
کابل شهردارلیگی ایشچیلریدن بیرقطارینینگ ایتیشیچه، شهردارلیک مامورلریدن بیرقطاری تیلنچیلیک قیلهدیگن چاغیده، شهردارلیکنینگ تیکشیروچی کمیتهسی تامانیدن توتقونگه آلینیب ایشدن بوشهتیلگن، بیراق انچه پیتدن کیین و ظیفهسیگه قیتیب و قیتهدن تیلنچیلیککه قول اورگن.
کابل شهری اینیقسه شهردارلیک ریاستی و زرنگار پارکی اطرافیده بیر آز یورسنگیز بیرقطار سَریغ کییملی تیلنچیلرگه کوز توشهدی. اولردن بیری بیلن صحبت اوتکزگن چاغده، اقتصادی وضعیت یمانلیگی و آیلیگی کم بولگنیدن شکایت قیلدی و آیلیکلری ییتیشرلی ایمس لیگینی ایتدی.
بیللی ایمس، حقیقتده بو وضعیت خصوصیده کیم عیبدار؛ دولت، سوداگرلر یا شهر یشاوچیلری؟ دولت 14 ییلدن کیین مملکت اوقوتووچیلرینینگ آیلیگی یوقاری کیتیش ریجهسینی عملگه آشیردی. کورینیشیچه، شهردارلیک ایشچیلرینینگ آیلیگی بیش یریم مینگ افغانی دن یوقاری ایمس دیر. بیراق سَریغ کییملیلرنینگ قچانگچه شوندهی بیر وضعیتده حیات کیچیریشی بیللی ایمس.
