ملی اسلامی جنبش حزبینینگ ییریک اعضالریدن بیری نینگ ادعا قیلیشیچه، نظامالدین قیصارینی قولگه آلیش اوچون اویوشتیریلگن عملیاتده ناقانونی قوراللیلر اهالی ماللرینی تالان قیلگن.
ملی اسلامی جنبش حزبی نینگ اعضاسی و برقرارلیک و یقینلیک سیلاو تیمی نینگ بیرینچی اورین باسری عنایتالله بابر فرهمند نینگ سلاموطندارگه ایتیشیچه، فاریاب ولایتی نینگ قیصار تومنینی سابق پولیس قومندانی نظامالدین قیصاری نینگ قولگه آلیش اوچون اویوشتیریلگن عملیاتده ناقانونی قوراللیلر اشتراک قیلیب و اهالی ماللرینی تالان قیلگن.
جناب فرهمندگه کوره، ناقانونی قوراللیلر بلخ محلی قومندانلریگه تیگیشلی ایکنلر.
مزارشریف شهری نینگ 5- ناحیهسی یشاوچیلریدن بیرقطارینینگ ایتیشیچه، ایشیکلری سندیریلگن و ماللری تالان قیلینگن.
اولرنینگ ایتیشیچه، بیرقطار قوراللی کیشیلر شخصی کییم بیلن امنیتی کوچلر آرهسیده کورینهریدی.
بیراق، بلخ پولیس قومندانی اجمل فایز اوشبو عملیاتده ناقانونی قوراللیلرنینگ حضورینی رد قیلیب ایتیشیچه، کماندو خاص کوچلری، اردو و 888- قطعهسیدن باشقه هیچ بیر نهاد بو عملیاتده اشتراک قیلمهگن.
ایتیلیشیچه، قومندان توفان و اختر ابراهیمخیلگه تیگیشلی بولگن قوراللی کیشیلر اوشبو عملیاتده اشتراک قیلگن، بیراق جناب ابراهیمخیل خبری بیر ییغینده بو ادعانی رد قیلهدی. اونینگ ایتیشیچه، قیصاری بیلن هیچقندهی خصومتی یوق دیر.
اجتماعی ترماقلرده ترقهتیلگن صورت و ویدیولرگه کوره، ناقانونی قوراللی کیشیلر اوشبو عملیاتده اشتراک قیلیب جناب قیصاری نینگ صورتلرینی ییرتهدی و قیصارینی قاچیب کیتیشگه مجبور قیلگنلرینی بیلدیرهدیلر.
فاریاب ولایتی نینگ قیصار تومنینی سابق پولیس قومندانی نظامالدین قیصاری اوتگن ییل سرطان آیده انسان حقلرینی نقض قیلیش و امنیتی مقاملرنی تهدید قیلگنی باعث، ملی خوفسیزلیک ریاستی تامانیدن قولگه آلینیب و کابلگه انتقال بیریلگن ایدی، بیراق نیچه آی آلدین قوییب یوباریلدی.
