پرلپسې ناسوبتیا او د ولسي جرګې د نصاب نه بشپړېدو له کبله اداري پلاوی اړ شو چې د ۱۳۹۶ کال د کب میاشتې له ۱۹مې نېټې د روان کال غبرګولي تر ۲۸مې د استازو سوب او ناسوب بربنډ کړي؛ دا چاره د ځېنو وکیلانو له سختو نیوکو سره مخ شوه.
د ترتیب شوې حاضرۍ پربنسټ، د ولسي جرګې زیاتره غړي تراوسه پورې تر ۴۰ ورځو ناسوب دي.
د ولسي جرګې رییس عبدالروف ابراهیمي او دغهراز د ولسي جرګې بل غړي عبدالقادر وطندوست وړاندې شوی لېست ناقص وباله او ټینګار وکړ چې باید په دې لېست دې کره کار وشي.
د ولسي جرګې اعتراض کوونکي وکیلان وايي، که اداري پلاوی د حاضرۍ په برخه کې دقیق او اصولي وی، له دایمي ناسوبو وکیلانو سره یې باید چلند کړی وی او د اداري پلاوی له وکیلانو سره دوهګونی چلند کوي.
د ولسي جرګې منشي میرداد نجرابي د اعتراض کوونکیو په ځواب کې وویل، اداري پلاوی له وکیلانو سره د ولسي جرګې د کورنیو اصولو پربنسټ چلند کړی دی. زیاتوي، د وکیلانو له لاسلیک او هوکړې وروسته د ترتیب شوې حاضرۍ پایله اعلان شوې ده.
د ولسي جرګې اداري پلاوي د جرګې په دایمي کمېسیونونو او عمومي جلسه کې د وکیلانو ناسوبتیا په اړه نوې پرېکړه واوروله. کوم وکیلان چې په دې جلسو کې موجودیت ونهلري؛ د پرېکړې پربنسټ ناسوب ګڼل کېږي او د امتیازونو سلب سربېره قانوني چلند ورسره کېږي.
