د ثبات او همپالنې په نوم د اجرایوي رییس عبدالله عبدالله ټاکنیزې ډلې د یوې خبرپاڼې په خپرولو سره د سولې په مشورتي جرګه کې د دې ډلې د نه ګډون خبر ورکوي.
په دې خبرپاڼه کې لیکل شوي چې په یاده ډله کې شامل ګوندونه او سیاسي شخصیتونه تر دې دمه د سولې مشورتي لویې جرګې اړوند د مشورې طرف نه وو او د دې جرګې اړوند قانع کوونکي دلایل هم نهلري.
د ثبات او همپالنې ډلې ویاند بشیراحمد تهینج سلاموطندار ته وویل، حکومت د هغه نفوذ له مخې چې د جرګې پر غړیو یې لري، هڅه کوي چې د جرګې پایلې په خپله ګټه را وڅرخوي او په وینا یې که په یاده جرګه کې ګډون وکړو، یوې ناقانوني موضوع ته مشروعیت ورکوو.
په ورته وخت کې د سیاسي چارو شنونکي وايي، د ثبات او همپالنې ډله فکر کوي چې په جرګه کې ښايي داسې پرېکړه وشي چې پایله یې د ولسمشر غني په ګټه وي؛ نو له همدې امله غواړي دا جرګه ګډهوډه کړي.
د سولې مشورتي لویه جرګه د راتلونکي کال د غوايي پر ۹مه جوړېږي
ولسمشر: په کابل کې به د سولې مشورتي جرګه جوړه شي
د سیاسي چارو شنونکی احمد سعیدي وايي، د سولې په مشورتي جرګه کې د ثبات او همپالنې ډلې نه ګډون د دې ښکارندویي کوي چې د ملي یووالي حکومت په خپل منځ کې هېڅ ډول همغږي نهلري.
د سولې مشورتې جرګه په پام کې ده د روان کال د غويي میاشتې په ۹مه نېټه د ټول هېواد په کچه د شاوخوا ۳ زرو کسانو په ګډون د درېوو ورځو لپاره په کابل کې جوړه شي.
