زدران تجارت مرکزی‌ده یوزبیرگن یانغین حقیقتی‌نی تاپیش کمیسیونی‌نینگ ایتیشیچه، اوشبو واقعه 17 میلیون دالر زیان ییتکیزگن.
بوگون (چهارشنبه) خبری بیر ییغین اوتکزگن اوشبو کمیسیون باشلیغی سیروس علاف‌نینگ ایتیشیچه، اوشبو حادثه‌دن زیان کورگن‌لرگه حکومت تامانیدن یاردم بیریلیشی کیره‌ک. جناب علاف‌نینگ ایتیشیچه، امنیتی تیکشیروو یکونلنگنی‌دن کیین، بو کمیسیون‌نینگ تولیق نتیجه‌سی جمهور رییس‌گه تاپشیریله‌دی.
اوشبو یانغین‌نینگ مالی زیانی‌نی تیکشیرووچی کمیسیون باشلیغی، حکومت‌دن بیمه شرکت‌لری‌گه فعالیت قیلیش اوچون رخصت بیریشی‌نی سوره‌گن.
آلتی کون آلدین، (14- اسد) کابل شهری کوته‌سنگی منطقه‌سیده جایلشگن زدران تجارت مرکزی‌ده یانغین یوز بیردی. یانغین اوچیرووچی اداره خادم‌لری محل‌گه ییتیب باردی، بیراق یانغین سونگی قبت‌دن باشلنگنی باعث، هیچ بیر ایش قیله آلمه‌دیلر.
زدران تجارت مرکزی‌ده یوزبیرگن یانغین حقیقتی‌نی تاپیش کمیسیون اعضاسی صیام‌الدین پسرلی‌نینگ سلام‌وطندارگه ایتیشیچه، اوشبو تجارت مرکزی‌نینگ کمیده 98 فایزی اوتگه یانگن و قالگن ایکی فایزی‌نینگ تَورلری کم بها دیر.
جناب پسرلی‌نینگ کوپه‌یتیریشیچه، اوشبو دوکان‌لر تازه‌لنیب و انجنیرلر تامانیدن تیکشیریلیب قیته قوریلگنی‌دن کیین، دکان‌دارلرگه تاپشیریله‌دی.
مذکور تجارت مرکزی اوتگه یانگن بیرینچی مرکز ایمس دیر. شونینگ‌دیک بوندن آلدین، جمهوریت مارکیتی و کابل منده‌یی‌سی اوتگه یانیب میلیون‌لرچه دالر زیان کورگن‌لر.
