د دې غورځنګ غړو نن ( چهار شنبه) په خبري غونډه کې وویل، چې د زمري میاشتې د دویمې ورځې د دهمزنګ پېښې ټپيانو په درملنه کې زیات شمېر دولتي روغتونونو بې غوري کړې او زیات شمېر ټپیان یې د درملنې په موده کې روخصت کړي وو.
د روښنایۍ غورځنګ غړی عارف رحماني وايي، د دولتي روغتونونو د مسوولو ډاکټرانو د نه پاملرنې له امله هغه شمېر ټپیان چې د درملنې په موده کې روخصت شوي وو، له روغتیايي ستونزو سره مخ دي او د بیا درمنلې له پاره شخصي روغتونو ته وړل شوي دي.
د رحماني په خبره زیات شمېر دولتي روغتونونو د ټپيانو درملنې په برخه کې د ولسمشر هدایت ته هم پاملرنه ونه کړه.
دی وايي، نړیواله ټولنه سره له دې چې له ولسواکۍ، بشرحقونو او د مدني ټولنو له پیاوړتیا خبرې کوي یوازې یې د غندنې پیغام ورکړ او د پېښې له قربانیانو سره یې هېڅ ډول مرسته ونه کړه.
په ورته وخت کې د عامې روغتیا وزارت ویاند اسماعیل کاووسي سلام وطندار سره په مرکه کې دغه ادعاوې رد کړې او ویې ویل، دولتي روغتونونو د موجودو امکاناتو څخه په استفادې د ټپیانو درمنله کړې او هڅه یې کړې.
کاووسي وايي، هېڅ ټپي د درملنې په وخت کې له روغتون څخه نه دی رخصت شوی او یوازې هغه ټپیان چې سطحي ټپیان شوي وو، له درملنې وروسته رخصت شوي دي.
د روان کال د زمري میاشتې په دویمه نېټه د دهمزنګ په چاودونه کې د روښنايۍ غورځنګ ۸۰ تنه ووژل شول او له ۲۳۰ تنو زیات ټپيان شول.
