د وسلهوالو طالبانو ویاند ذبیحالله مجاهد رسنیو ته په یوې لېږل شوې خبرپاڼې کې ویلي چې په قطر کې د طالبانو د سیاسي دفتر مشر ملا برادر اخوند په دوحه کې په افغانستان کې د ملګرو ملتونو د استازولۍ «یوناما» له مشر تادامیچي یاماموتو سره کتلي دي.
د طالبانو خبرپاڼه کې راغلي چې دا لیدنه پرون شوې او دواړو خواو د سولې پر روان بهیر، په افغان جګړه کې د ملکي تلفاتو پر موضوع او همدا راز د طالبانو تر کنترول لاندې سیمو کې پر بشري مرستو خبرې کړېدي.
په کابل کې د یوناما دفتر د ښاغلي تادامیچي یاماموټو او د طالب مشر ملا برادر ترمنځ مخامخ غونډه نه تایيد کړې او نه یې هم رد کړېده.
مُلا عبدالغني برادر د سږکال په جنورۍ کې په قطر کې د طالبانو د سیاسي دفتر مشر شو.
