د کندوز ولایت یو شمېر ځوانان او مدني فعالان وايي، د دغه ولایت څلور ولسوالۍ د طالبانو په ولکه کې دي او ترڅنګ یې د کندوز ښار په ګډون څو نورې ولسوالۍ د سقوط له ګواښ سره مخ دي.
دغه مدني فعالان په شمال ختیځو ولایتونو په ځانګړي توګه کندوز کې د ناامنیو زیاتېدو په اړه جدي اندېښنه ښيي.
د کندوز یو شمېر مدني فعالانو او ځوانانو دغه څرګندونې په کابل کې یوې رسنیزې غونډه کې وکړلې.
مدني فعال فیض فرهمند وویل، که دولت د کندوز ولایت امنیت ټينګښت ته جدي پام ونه کړي؛ کندوز به یو ځل بیا د طالبانو لاس ته ورشي.
د کندوز مدني فعاله نوریه نادر هم خبرداری ورکوي، چې د کلای ذال سقوط نورو ولسوالیو او سیمو ته د خطر زنګ دی.
خو د ملي دفاع وزارت مرستیال ویاند محمد رادمنش وايي، په کندوز ولایت کې د طالبانو پر وړاندې له ټولو شته امکاناتو کار اخلي.
د رادمنش پروینا امنیتي ځواکونه به هېڅ وسلهوالې ډلې ته اجازه ورنه کړي، چې په ولایت او ولسوالیو ولکه ټینګه کړي.
