د کندهار د اطلاعاتو فرهنګ ریاست مسوولان وايي، دوی غواړي، چې د دې ولایت په عینو ښارګوټي کې د هېواد په کچه د کتابتون او موزیم له پاره ځانګړې ودانۍ جوړې کړي.
د کندهار د اطلاعاتو او فرهنګ رييس حضرت ولي هوتک سلام وطندار ته وویل، د دغه موزیم او کتابتون پر ودانیو دوه نیم میلونه امریکايي ډالر لګښت راځي، چې د افکو کمپنۍ او د اطلاعاتو او فرهنګ وزارت پرغاړه اخیستی دی.
ښاغلي هوتک زیاته کړه، دوی هڅه کوي، د دې کتابتون څانګې د کندهار ښار نورو برخو ته هم وغځوي چې له دې سره به کتاب ته د کندهاریانو لاسری اسانه شي:
د ده پر وینا، د کتابتون او موزیم په دې نویو ودانیو کي به ټولي اسانتیاوې په پام کي نیول شوې وي او دا به د هېواد په کچ یوه نمونه وي.
د کندهار د اطلاعاتو او کلتور وزارت مسوولان ټینګار کوي، چې د دغه ولایت په اطلاعاتو او فرهنګ ریاست کې د موزیم ودانۍ شته، خو بېخي وړه ده.
د کندهار فرهنګیان، د پوهنتون استادان او مدني فعالان د موزیم او کتابتون له پاره د نويو ودانیو جوړول ستره کلتوري لاسته راړونه بولي.
د کندهاري فرهنګیانو په باور، پر دې دوو ودانیو باید بسنه ونه شي، بلکې نورې ورته ودانۍ هم جوړې شي، چې د کندهار د هرې ولسوالۍ او ښار د هرې سیمې اوسېدونکي ورته په اسانۍ لاسرسی ولري.
