په رسنیو کې د ښځینه خبریالانو د ځورولو مخنیوي منشور نن په کابل کې ارایه شو.
په افغانستان کې د ښځینه خبریالانو د ملاتړ مرکز رییسه فریده نیکزاد د دې منشور د اورولو پرمهال خبري غونډې ته وویل، په رسنیو کې له ښځو سره دوګونی چلن او د هغو ځورول کېدل د دې سبب شوي چې ډېرې ښځینه خبریالانې دندې پرېږدي.
د ښځینه خبریالانو د ځورولو مخنیوي منشور د اطلاعاتو او کلتور وزارت او د رسنیو د مسوولانو له لوري پلي کېږی چې ښځینهوو ته په رسنیو کې بیاځلي د کار اسانتیا برابره شي.
په رسنیو کې د وړتیا لهمخې په مدیریت، تصمیمنیونه، مقررۍ، ظرفیتلوړونه، د حقوقو ورکول او د هغوی د شکایتونو اورېدل د دې منشور مهم ټکي ښودل شويدي. دا منشور قانوني دستورالعمل نهلري او یوازې اخلاقي او مسلکي ژمنه ګڼل کېږي.
د اطلاعاتو او کلتور وزارت معین سید حسینآقا فاضل سانچارکي له دا ډول طرحې نه د ملاتړ اعلانولو ترڅنګ وویل چې دې وزارت ۵ میاشتې مخکې د خبریالانو شکایتونو ته د رسېدنې په پار یوه کمېټه جوړه کړېده؛ خو په وینا یې، ډېر پروګرامونه د بودیجې د نهشتوالي له امله نه عملي کېږي.
د اطلاعاتو او کلتور وزارت معین او د رسنیو مسوولانو د دې منشور په پای کې لاسلیکونه وکړل چې د ښځینه خبریالانو د ځورولو مخه ونیول شي.
