د ازادو رسنیو ملاټر ادارې یا نی مسوولین وايي، چې افغان ولسمشر محمد اشرف غني رسنیو ته د سپکاوي له امله باید بښنه وغواړي.
دوی ادعا کوي، چې ولسمشرغني د هیواد په شمال کې د ملي اردو له افسرانو او سرتیرو سره په لیدنه کې ویلي، چې له رسنیو باد راووځي او له امنیتي ځواکونو بم.
نی د یوې خبرپاڼې په خپرولو سره ویلي، چې خبریالان باید وستایل شي.
له بل لوري د رسنیو څار مسوول صدیقالله توحیدي سلام وطندار ته وویل، چې د باد وتلو اصطلاح کارول د افغانستان رسنیو ته سپکاوی دی.
توحیدي زیاته کړه، د ولسمشر موخه چې هرڅه وه خو باید هغه خبریالان ستایلي وای نه دا چې خبریالانو ته يې سپکاوی کړي وای.
صدیقالله توحیدي وویل، چې دوی هم د امنیتي ځواکونو ملاتړي دي، خبریالان هم د سرتیرو په شان سختو او له ګواښونو ډکوشرایطو کې کار کوي او د سپکاوي پرځای باید وستایل شي.
د ولسمشر مرستیال ویاند دواخان مینهپال په دې اړه سلام وطندار ته وویل، دوی دا موضوع څیړي او غواړي مالومه کړي چې د ولسمشر په وینا کې داسې کوم څه شته او که نه؟
د مینهپال پروینا، له هغه وروسته به دوی په دې اړه دریځ څرګند کړي.
دا داسې مهال ده، چې د رپوټونو پربنسټ سږ کال خبریالانو ته له تاوتریخوالي ډک کال ښودل شوی او له زیات شمیر خبریالانو سره په بېلابېلو بڼو تاوتریخوالی شوی.
