که څه هم په وروستیو ۳ کلونو کې د کرېکټ بورډ لپاره درې رییسان وټاکل شول او په ننګرهار کې هم ۴ والیانو دندې وکړې، خو د دغه ولایت کرېکټ لوبغالی لا هم پر خپل حال دی.
سره له دې چې د کرېکټ بورډ پخوانیو رییسانو نسیمالله دانش په ۲۰۱۶ او عاطف مشعل په ۲۰۱۷ کال کې د دغه کرېکټ لوبغالي د جوړولو لپاره ننګرهار ته د سفرونو پر مهال ژمنې وکړې، خو د کرېکټ بورد اوسني رییس یې ایله د چارو د ځنډ اصلي لامل رابرسېره کړ.
د کرېکټ بورډ اوسني رییس عزیزالله فضلي د ۱۰ کسیزی ډلې سره د ختیځو ولایتونو په سفر کې له لغمان او کونړه له راستنېدو وروسته د ننګرهار کرېکټ لوبغالي ته هم ورغلی او موندلې یې ده چې د چارو د ځنډ یوازینی لامل یې د ځمکې کموالی دی.
دا په داسی حال کې ده چې د بهسودو کرېکټ لوبغالي قراراد او د چارو پیل د همدغو اوسنیو لوړو پوړیو چارواکیو او کارکوونکيو د دندې پرمهال او مشورو پېل شوی و چې د کرېکټ بورډ په وینا له ۲۵ جریبه نه په زیاته ځمکه کې به جوړېږي، خو اوسنۍ اداره وایي، د دی پروژې د بشپړېدو لپاره ۳۰ جریبه ځمکې ته اړتیا ده او همدا لامل دی چې چارې یې ځنډېدلې دي.
د کرېکټ بورډ عمومي رییس عزیزالله فضلي د ننګرهار له والي حیاتالله حیات سره په لیدنه کې ویلي چې د بهسودو کرېکټ لوبغالی به په نړیوالو معیارونو برابر د څو میلیونه ډالرو په لګښت جوړ کړي.
د فضلي په وینا، د بهسودو کرېکټ لوبغالي پروژه کې به د لوبغالي ترڅنګ، سرپټې او خلاصې کرېکټ اکاډمي، د غړیو ښکلا جېم، دفترونه او مېلمستون ولري چې په مټ به یې د افغانستان کرېکټ ملي لوبډلې د تمریناتو اوسنۍ ستونزه هم په خپل هېواد کې حل شي.
دغه راز د کرېکټ بورډ اجرایوي مشر شفیقالله ستانکزي له سیمهییزې ادارې وغوښتل چې په ګډه ورسره کار وکړي، څو سږ کال د بهسودو کرېکټ لوبغالي د هوارولو، کانالېزاسیون، اوبو او چمن کرلو چاری بشپړې کړي. نوموړي تمه وښوده چې په ننګرهار کې د بهسودو کرېکټ لوبغالي دغه پروژه به په ۳ پړاوونو کې پای ته ورسېږي.
د کرېکټ بورډ له پلاوي سره په لیدنه کې د ننګرهار والي حیاتالله حیات هم ژمنه وکړه چې د لوبغالي ټول قانوني اسناد به کرېکټ بورډ ته وسپاري، د لوبغالي د لومړي پړاو چارې به له کرېکټ بورډ سره په ګډه پیلوي او هېچا ته به اجازه ور نهکړي چې د دې ملي پروژې د پرمختګ مخه ډب کړي.
