په جوزجان کې یو شمېر کڼې نجونې چې له فوټبال لوبې سره یې مینه ډېره شوې وايي، په نړیوالو لوبو کې د برخې اخیستو لپاره په تمرینونو بوختې دي او غواړي وښيي چې معلولې نجونې کمزورې نهدي.
د کڼو نجونو روزونکې سمیرا ملکیار وايي، په جوزجان کې کڼې نجونې له یو کال راهیسې د فوټبال په لوبو بوختې دي چې شمېر یې له ۶ نه ۱۳ ته لوړ شوی دی. د نوموړې په وینا، دا لوبډله د سویډن کمېټې په مرسته جوړ شوی او په فوټبال فدراسیون کې د کڼو یوازینۍ لوبډله ده.
په شمال زون کې د سویډن کمېټې ټولنې ته د معلولیت ستنېدو څانګې مسوول محمدناصر کمال په سپورټي ډګرونو کې د ښځینه فوټبالرانو برخې اخېستو په اړه خوښي څرګندوي او وايي، اوس په جوزجان کې ۱۳ کڼې نجونې د فوټبال پر لوبو بوختې دي.
په جوزجان کې د ښځینه فوټبال فدراسیون کمېټي مسووله زولیا صمیمي په دغه ولایت کې د لوبو بېلابېلو برخو کې د ښځو پراخه ونډه ستايي او وايي، د هرې ورځې په تېرېدو سره د ښځو مینه له لوبو سره ډېرېږي او اوس یې شمېر ۸۵ کسانو ته رسېږي.
په جوزجان کې د ښځینه فوټبال فدراسیون کمېټې مسووله وايي، که نجونو ته لا ډېر فرصتونه برابر شي، هغوی کولای شي ډېر بریالیتوبونه ترلاسه کړي.
جوزجان د هېواد د هغو شمالي ولایتونو له ډلې یو دی چې د ټولنیزو ستونزو له موجودیت سره سره د لوبو په ډګر کې د ښځو ونډه ډېره ده.
