د فراه ولایت د امنیه قومانداني وايي، چې د دې ولایت د خاک سفید ولسوال عبدالخالق خان نن سهارمهال د ماین په چاودنه کې ووژل شو.
د دې ولایت د امنیې قوماندان ویاند اقبال بایر وویل، چې د خاک سفید ولسوال نن سهارمهال د فراه ښار په چهارباغ سیمه کې د سهار د لمانځه له ادا کولو نه وروسته د خپل کور په لوري روان و، چې د ریموټکنټرول بم په چاودنه کې یې خپل ژوند له لاسه ورکړ.
د فراه د امنیې قوماندانۍ ویاند همدارانګه وویل، چې ماین یې د کور په څنګ کې اېښودل شوی و.
په همدې حال کې طالب ویاند قاري یوسف احمدي د دې پېښې مسوولیت په غاړه اخیستی او ویلي یې دي، چې عبدالخالق یې د خپلو کسانو سره د یو ځای پرځای شوي ماین په چاودنه کې وژلی دی.
