د فاریاب ولایت د کوهستان ولسوالي قومي مشران او د سیمې اوسېدونکي وايي، چې له څلورو ورځو راهیسې لسګونو وسله والو طالبانو د دې ولسوالۍ د نیولو له پاره د بندر او لولاش په سیمو بریدونه پیل کړي دي.
دغه خلک د کوهستان ولسوالۍ په اړه اندېښنه لري او وايي، چې که حکومت ورته پاملرنه ونه کړي دغه ولسوالۍ به د طالبانو لاسته ورشي.
د کوهستان ولسوالۍ ولسي شورا رییس ډاکټر سعادت سلام وطندار ته وویل، چې په دغې ولسوالۍ له تېرو څلو ورځو راهیسې څو ډله ییز بریدونه وشول.
د یادې شورا رییس وايي، چې د مرستندویه ځواکونو د رالیږلو لپاره یې څو ځلې له مرکزي حکومت نه غوښتنه کړې ده، خو تر اوسه یې کوم اقدام نه دی کړی.
د یادې ولسوالۍ یو تن اوسېدونکي د نوم نه څرګندولو په شرط وویل، چې که د لولاش او بندر سیمې سقوط وکړي، د ګرزیوان، بلچراغ، المار او قیصار ولسوالیانې د طالبانو تر ګواښ لاندې راځي.
په ورته وخت کې د فاریاب ولایت سیمه ییز چارواکي وايي، چې کوهستان ولسوالۍ ته د مرستندویو ځواکونو په لیږلو سره د ولسوالۍ د سقوط اندېښنې له منځه تللي دي.
د فاریاب ولایت سرپرست عبدالستار بارز سلام وطندار ته وویل، چې دمګړۍ امنیتي ځواکونه دهوا له لارې د ولسي پاڅونونو ملاتړ کوي.
بارز وايي، چې د نښتو په ترڅ کې تر دې مهاله پورې ۴ طالبان وژل شوي او ۴ نور ټپیان شوي دي.
فاریاب د شمالي ولایتونو له ډلې ناامنه ولایت دی، چې په وروستیو څو میاشتو کې په پرلپسې توګه د طالبانو له لوري پرې بريدونه زیات شوي.
