د بلخ عدلیې ریاست: قانون ماتوونکي دولتي کسان دي

د بلخ ولایت د عدليې او قضايي بنسټونو چارواکي وايي، چې په زیاتو برخو کې قانون د امنیتي ځواکونو او زورواکو له لوري تر پښتو لاندې شوی دی.

هغه شمېر کسان چې د اساسي قانونو د اونۍ په مناسبت را ټول شوي وو، له حکومت څخه یې وغوښتل، چې د هغو دولتي کسانو او زورواکو مخه دې ونیسي، چې اساسي قانون یې نقض کړی دی.

د بلخ ولایت د عدلیې رییس جعفر مصباح وايي، چې زورواکي او دولتي چارواکي د خپل قدرت نه په استفادې قانون په خپله غوښتنه تعبیروي.

مصباح زیاته کړه، چې قانون د زیاتو کسانو له خوا مات شوی دی، خو د ځېنې د لایلو له مخې نشي کولی، چې نمونه یې ښکاره کړي.

د دغه ولایت د عدلیې رییس وویل، د هغو کسانو نوملړ چې د خپل زور څخه په استفادې قانون تر پښو لاندې کړی دی موجود دی، خو افشا کول یې د دغه ریاست په صلاحیت کې نه دي.

له بل لوري د بلخ امنیه قوماندان سید کمال سادات وايي، چې په زیاتو برخو کې قانون ماتوونکي نیول شوي دي او عدلي او قضايي ارګانونو ته یې ور پېژندلي دي.

د زورواکو له خوا د قانون ماتول هغه ستونزه ده، چې د پخواني ولسمشر حامد کرزي او د اوسني حکومت په موجودیت کې هم د جنجالونو ټکی دی.

سره له دې چې نړیوالو او ملي بنسټونو د قانون له ماتوونکو سره مبارزه کړې ده، خو تر دې دمه پورې دغه ستونزه په پوره ډول حل شوې نه ده.