د عامې روغتیا وزیر فیروزالدین فیروز وايي، چې اروپايي ټولنې ۸ میلیونه یورو دغه وزارت سره د رواني ناروغانو درملنې او د معیوبیونو ظرفیت لوړولو په برخه کې مرسته کړي دي.
فیروز وویل، ټاکل شوې ده، چې دوه نړیوالې موسسې به د ۳ کلونو په موده کې د اروپايي ټولنې مرستې تطبیقوي او د عامې روغتیا وزارت به په کې نظارتي رول لري.
د دغه وزارت چارواکو په خبره، شاوخوا ۳۰ سلنه افغانان په رواني ناروغیو او له ۵۰ سلنو زیات په رواني ستونزو اخته دي.
په هېواد کې د جګړو دوام، ناامني، نا سم اقتصاد د رواني ستونزو او ناروغیو لاملونه دي.
د عامې روغتیا وزیر وايي، چې په هېواد کې د رواني ستونزو او ناروغانو د شمېر زیاتوالي ته په کتو د دوی امکانات او ظرفیتونه کم دي او زیاته کړه، چې د اروپايي ټولنې ۸ میلیونو یورو د مرستو له ډلې ۳ میلیونه یې د رواني درمنلې او په رواني برخه کې ۲۵۰ سلا کارانو په روزلو مصرف شي او پاتې ۵ میلیونه یورو به د روغتیايي حالت ښه کولو او د معیوبینو ظرفیت لوړو په برخه کې به مصرف شي.
دغه وزارت وايي، چې د رواني ناروغانو درمنلې په برخه کې کافي اندازه درمل لري، خو د رواني درملنې په برخه کې په کافي اندازه انساني ځواک نه لري.
د عامې روغتیا د شمېرو له مخې په ټول هېواد کې ۲۱۰۰ روغتیايي مرکزونه موجود دي، چې یواځې د رواني درملنې په برخه کې ۲۰۰ سلا کار ډاکټران ناروغانو ته سلاوې ورکوي.
