راپورونه وايي، چې د هلمند ولایت په موسی کلا ولسوالۍ کې د الزرقاوي په نوم يو مهم قومندان د ۳۱ نورو طالبانو سره وژل شوی دی.
د هلمند ولایت د والي ویاند عمر ځواک سلام وطندار ته وویل، چې تېره شپه وسله والو طالبانو د ملي اردو پر امنيتي پوستو بريدونه وکړل، چې وروسته افغان ځواکونو په هېواد کې له مېشت بهرنيو ځواکونو د هوايي ځواک څخه مرسته وغوښته.
د نړېوالو ځواکونو د هوايي برید له امله په دغه ولسوالۍ کې د الزرقاوي په ګډون ۳۱ تنه وسله وال طالبان ووژل او شاوخوا ۳۰ تنه نور يې ټپيان شول.
دغه بريد، چې د موسی کلا ولسوالۍ په خټکي سيمه کې ترسره شو په کې د طالبانو نومول شوی ولسوال ملاطالب هم وژل شوی دی.
د ځواک په خبره، په دې برید کې ګڼې وسلې او جنګې مهمات هم له منځه وړل شوي او طالبان د جګړې له کرښې په شاه تنبول شوي دي.
دا په داسې حال کې ده، چې له تېرو څو ورځو راهیسې په دغه ولسوالۍ کې امنيتي ګواښونه زيات شوي او د ویرې او ترهې سيوری په کې حاکميت کوي.
ياده دې وي، چې په دې هکله تر اوسه وسله والو طالبانو څه نه دي ویلي.
