د سرپل ولایت مقام کې «اخلاقي فساد»

د سرپل د والي د یارو په څنګ کې د څوو ښځو سره یوځای عکسونو له خپرېدو وروسته حکومتي سرچینې د دې ولایت په مقام کې د اخلاقي فساد خبر ورکوي.  

یوې سرچينې د نوم نه ښودلو په شرط سلام وطندار ته وویل چې د سرپل د والي یاور له خپلو صلاحیتونو نه په ګټنې د ولایت مقام د شپې له لوري د خپل «وخت‌تېري» په توګه کاروي.

په ولسي جرګه کې د سرپل استازی حمیدالله بیک هم دا موضوع تاییدوي او وايي چې ده ته هم دا ډول اطلاعات رسېدلي دي. ښاغلی بیک له مسوولانو د دې قضیې د څېړنو غوښتنه کوي او زیاتوي، هغه څوک چې له وظیفوي صلاحیتونو ناسمه استفاده کوي، باید د قانون منګولو ته وسپارل شي.

د سرپل اوسېدونکي هم د دې ولایت د والي یاور خالد ترکمن عکسونه خپرولو په غبرګون کې وايي چې د محلي حکومت په جوړښت کې د دا ډول موکې‌طلبو کسانو موجودیت؛ د حکومت په اړه د دوی نظر بدل کړی‌‌دی.

دوی له مرکزي حکومته غواړي چې د سرپل ولایت مقام ژر تر ژر پر اخلاقي فساد د ککړو کسانو له حضوره پاک کړي.

خو د سرپل د والي یاور خالد ترکمن دا ادعاوې ردوي او خپاره شوي تصویرونه جالي بولي. هغه وايي، هغه ښځې ـ چې په‌دې تصویر کې ځای شوې‌دي ـ ده کله هم نه‌دي لیدلي او نه یې پېژني.

د سرپل والي عبدالقادر اشنا هم دا تصویرونه د ولایت مقام پر وړاندې تبلیغات بولي او وايي چې دا خبرې حقیقت نه‌لري.