د پاکې هوا له نړیوالې ورځې سره هم مهاله د ولسمشر دویم مرستیال سرور دانش د ککړې هوا له کبله د خطرونو په اړه خبرې کوي. د دانش په خبره، ککړه هوا له کورونا ویروس نه ډېره خطرناکه ده او راروان ژمی د هوا د ککړتیا د کمولو مدیریت لپاره باید جدي تدابیر په پام کې ونیول شي.
د ولسمشرۍ ریاست دویم مرستیال وايي، عمومي بېوزلي او د چاپېریال ساتنې د ملي ادارې کمه بوديجه د هوا ککړتیا د مدیریت په وړاندې له اساسي ستونزو ګڼل کېږي.
د چاپېریال ساتنې ملي ادارې رییس شاه زمان میوندي هم وویل، د ککړې هوا د کچې کمولو لپاره د مسوولو ادارو ترمنځ سمه همغږي نشته او جدي اړتیا ده چې هره اداره په خپل مسوولیت سره په دې برخه کې ګام پورته کړي.
میوندي وايي، د هېواد ۹۰سلنه د هوا ککړتیا د ټرانسپورټ، انرژي او صنايعو سکټورونو له کبله ده او دا ادارې باید د پاکې هوا لرلو لپاره هېڅ ډول هڅې و نه سپموي.
د چاپېریال ساتنې د ملي ادارې رییس د کارخونو، د سوداګریزو ښارګوټو او د خښتو د بټیو له مالکانو غواړي چې هرڅه ژر د دود د تصفیې فلټر نصب کړي.
د راپورونو پربنسټ د نړۍ ۹۱ سلنه ټولنه د هوا ککړتیا له خطر سره مخ ده او کال کې یوازې ۷میلیونه کسان ککړې هوا له کبله مري.
