د کابل په دهمزنګ سیمه کې په لاریون د برید په ترڅ کې د وژل شویو لاریونوالو د ښخولو په مراسمو کې د روښنایۍ غورځنګ مشرانو وویل، چې دوی له خپلو غوښتونو نه تېریږي او د خپلو غوښتنو له پاره به مدني حرکتونه جاري وساتي.
د روښنایۍ غورځنګ غړي وايي، چې د قربانیانو د کورنیو په خوښې یې د پرون ورځې په برید کې وژل شوي کسان په ډله ییز ډول د امید سبز په ښار ګوټي د قرغ په تپه کې خاورو ته وسپارل.
ولسمشر په یوې خبرپاڼه کې د کابل ښاروالۍ ته هدایت ورکړی دی، چې دهمزنګ څلور لارې د شهیدانو د څلور لارې نوم ورکړي.
افغان ولسمشر غني په خپله وینا کې نن (یک شنبه) ورځ ملي ماتم اعلان کړی دی او د پېښې د څېړلو له پاره یې د لویې څارنوالۍ په مشرۍ ځانګړی کمېسیون ته دنده سپارلې ده.
د روښنايۍ غورځنګ غړی جعفر مهدوی وايي، دوی دغه ځانګړی کمېسیون نه مني او وايي، چې په دې کمېسیون کې باید د دې غورځنګ غړي شامل وی.
پرون ورځ (شنبه) د روښنایۍ غورځنګ زرګونو کسانو د سالنګ له لارې د وارداتي برېښنا مزي د لارې د بدلون په اړه لاریون وکړ او د کابل سړکونو او واټونو ته راووتل.
د کابل ګارنیزون ولسمشرۍ ماڼۍ ته ټولې غځېدلې لارې د کانتینرونو په اېښودلو وتړلې او لاریونکوونکو ته یې د دهمزنګ له څلور لارې د تېرېدو اجازه ور نه کړه.
لاریون کوونکو د دهمزنګ په څلور لارې کې د تحصن خېمې ولګولې، چې دوو ځانمرګو بریدګرو د لاریونوالو په منځه کې ځانونه والوزول.
په برید کې ۸۰ تنه لاریون کوونکي ووژل شول او ۲۰۰ تنه نور هم ټپیان شول.
داعش ډلې د یوې خبرپاڼې په خپرولو د پروني برید مسوولیت اخیستی دی.
