د فساد پر ضد مبارزه کې د افغانانو د همغږۍ ادارې یا افکک اجرایوي رییس صداقتعلي رضا نن په کابل کې یوې خبري غونډې ته وویل چې د فساد پر ضد مبارزې په موخه یې په نوې بڼه کمپاین پیل کړی دی.
یاد بنسټ خپل کمپاین د «صفر افغانۍ» په نوم نومولی دی.
د نوموړي په وینا، دغه کمپاین په تجربوي بڼه لومړی په کابل او ننګرهار کې پیل شوی چې په ترڅ کې یې د خپلې خوښې کارکوونکي کسان هڅوي چې دولتي خدمتونه باید له بډو پرته ترلاسه کړي.
د ده په وینا، په دغه کمپاین کې هغه خلک هڅول کېږي چې نه یوازې بډې نه ورکوي، بلکې د فساد پر ضد مبارزه هم کوي او هغه کسان افشا شي چې په ادارو کې بډې اخلي.
د دغه بنسټ یوه بل غړي احسانالله حکمت وویل چې د مدافع وکیلانو د لرلو ترڅنګ یې، د صفر افغانۍ کمپاین په ځانګړې تبلیغاتي او معلوماتي پاڼه کې خپلې شمېرې هم لیکلي چې خلک د فساد د نښو په لیدو ورسره اړیکه ونیسي.
د نوموړي په وینا، ډېر کسان له قانونه ناخبره دي؛ نو د دوی مدافع وکیلان به ورته قانوني حل لارې وړاندې او تر هغې وروسته، که کومه دعوا رامنځته کېږي، د محکمې له لارې یې دوی حل کوي.
که څه هم افغانستان سږ کال د فاسدو هېوادونو په نوملړ کې پنځمې درجې ته لوړ شوی، خو لا هم هېواد د نړۍ د فاسدو هېوادونو په کتار کې شمېرل کېږي.
اړوند مطالب:
