د چاریکارو د سبزیجاتو کارخانه د افغان حکومت، کاناډا دولت او د امریکا متحده ایالاتو پراختیايي ادارې ترمنځ د یوې هوکړې پراساس په ۱۳ جریبه دولتي ځمکه کې په ۱۳۸۳ کال کې د چاریکارو ښار په شمال خوا کې جوړه شوې او فعالیت یې پیل کړی.
خو دغه کارخانه له دوو کلونو فعالیت وروسته په کې د ځای پر ځای شوي ماین د چاودنې لهامله له فعالیته ولوېده.
داسې لاسوندونه سلاموطندار ته رسېدلي چې د ولسي جرګې غړې سامعه عزیزي مېړه د دې کارخانې ټوله ځمکه غصب کړې ده.
۲۱۳ ګڼه لاسوند په ۱۳۹۶/۰۷/۲۰ نېټه د پروان ولایت مقام د افغانستان د ځمکو خپلواکې ادارې ته لیکلي دي د چاریکارو د سبزیجاتو د پروسس کارخانه چې ټولټال په ۱۳ جریبه دولتي ځمکه کې اباده شوې په ناقانونه توګه د ولسيجرګې د یادې غړې د مېړه لهخوا غصب شوې ده.
د پروان ولایت د ځمکو ادارې رییس عبدالحمید امیري وايي، د دې ولایت د کلیو او پراختیا ادارې پخوانی رییس او د دغې کارخانې اجرایوي مدیر عبدالواسع عزیزي د خپلې مېرمنې سامعې عزیزي په ملاتړ کارخانه غصب کړې او بیا ځلي یې فعاله کړې ده.
د عبدالحمید امیري په خبره، دغه کارخانه په دولتي ځمکه کې اباده شوې او عبدالواسع عزیزي هېڅ داسې کوم معتبر قانوني لاسوند نه لري چې ثابته کړې دغه ځمکه د ده خصوصي ملکیت دی.
د پروان والي محمد عاصم عاصم سلاموطندار ته وویل، د دې کارخانې ځمکه د افغانستان د ځمکو خپلواکې ادارې ملکیت دی او د دغې ادارې لهخوا د کارخانې لهپاره ځانګړې شوې ده.
د پروان والي وايي:«د دې کارخانې د جوړولو ۶۰ سلنه لګښت د کاناډا دولت او د امریکا متحده ایالاتو پراختیايي ادارې لهخوا د بلاعوضه مرستو څخه ورکول شوی او ۴۰ سلنه پاتې لګښت یې یو انګلیسي بنسټ ورکړی دی؛ دغه راز ځمکه یې دولتي ده.»
خو د سبزیجاتو پروسس کارخانې اجرایوي مدیر عبدالواسع عزیزي ټینګار کوي د پروان والي هېڅ داسې لاسوند نه لري چې ثابته کړي د دغې کارخانې ځمکه دولتي ده. د ده په باور د چاریکارو د سبزیجاتو پروسس کارخانه خصوصي ملکیت دی نه دولتي.
د ولسيجرګې غړې سامعه عزیزي سادات د ځايي چارواکیو څرګندونې ردوي او وايي، دغه کارخانه یې غصب کړې نه ده؛ بلکې د زورواکو لهخوا د کارخانې د غصب مخنیوی یې کړی دی.
د پروان ولایت د سبزیجاتو پروسس کارخانه له دوو کلونو کار وروسته د ناامنیو د ګواښ لهکبله یې فعالیت ودرېد او تراوسه یې برخلیک معلوم نه دی.
