د سرپل امنیه قوماندان جیلاني ابوبکر د دغه خبر د تایید ترڅنګ، سلاموطندار ته ویلي چې ناپېژنده کسانو دوه شپې وړاندې د سرپل ښار په اړوند سیمه کې چې د طالبانو په واک کې ده، د یوې ښځې سر پرې کړی دی.
د سرپل امنیه قوماندان وايي، د سیمې اوسېدونکیو پرون د یادې ښځې جسد د لویې لارې پولیسو ته سپارلی او هغوی هم د سرپل مرکزي روغتون ته لېږدولی دی.
بلهخوا په کاپیسا کې دوو نجونو د زهرو په خوړلو سره ځانونه وژلي دي.
د کاپیسا امنیه قوماندان فرید مشعل د دغه خبر د تایید ترڅنګ وايي، یوې نجلې د دغه ولایت د کوهستان ولسوالي په لومړۍ برخه کې او یوې بلې هم د کاپیسا په مرکز محمودراقي ښار کې د تېرې اوونۍ په سهشنبې او چهارشنبې ورځو زهر خوړلي او ځانونه یې وژلي دي.
د کاپیسا امنیه قوماندان د دغو پېښو لامل کورنۍ ستونزې یادوي.
دا په داسې حال کې ده چې د ښځو چارو وزارت مسوولان وايي، په روان لمریز کال کې په دغه وزارت کې د ښځو پر وړاندې د تاوتریخوالي ۷ زره او ۴۱ پېښې ثبت شوي چې له ډلې یې ۵۱ هغه سختې وې.
