د روزګان ولایت د دوو ولسوالیو «شهید حساس او خاص روزګان» اوسېدونکي وايي، که څه هم دوی غواړي چې په ټاکنو کې ګډون وکړي، خو د ټاکنو ولایتي دفتر ورته اجازه نه ورکوي.
د دوی په وینا، د نوملیکنې پرمهال د ټاکنو کمېسیون هېڅ کارکوونکی یادو ولسوالیو ته نه وو ورغلي او همدا لامل دی چې پر پېژندپاڼو یې سټېکرونه لګولي نهدي.
د «شهید حساس او خاص روزګان» اوسېدونکي خیرمحمد او محمدګل وايي، د ټاکنو ملي پروسه کې ګډون یې حق دی او د طالبانو په ګډون ټول لوري باید په ټاکنو کې د ګډون لهپاره اسانتیاوې برابرې کړي.
دوی زیاتوي، په یادو ولسوالیو کې د امنیت ټینګښت او خلکو ته د رایې ورکولو اسانتیا برابرول د حکومت مسوولیت دی او تر هغې به د خپل حق غوښتلو لهپاره مبارزه وکړي چې په ټاکنو کې د ګډون حق ورکړل شوی نه وي.
خو په روزګان کې د ټاکنو کمېسیون ولایتي دفتر مسوول نجیبالله حقپرست که څه هم په ټاکنو کې د یادو ولسوالیو اوسېدونکیو ګډون د هغوی حق بولي، خو وايي، ټاکنو کې د ګډون لهپاره هېچا نوملیکنه کړې نهده.
د نوموړي په وینا، د روزګان په پنځو ولسوالیو؛ لکه: چنارتو، ګیزاب، چوره، دهراود او مرکز ترینکوټ کې په ټاکنو کې د ګډون لهپاره خلکو نوملیکنه کړې چې ټاکنې هم پهکې کېږي، خو په شهید حساس او خاص روزګان ولسوالیو کې ټاکنې نهکېږي.
روزګان ولایت په ولسي جرګې کې ۳ استازي لري چې دوه یې نارینه او یوه هم ښځینه ده.
اوسمهال په یاد ولایت کې ټولټال ۲۵ کسانو ځانونه نوماند کړي چې ۱۶ یې نارینه او پاتې ۹ یې ښځینه دي.
