ځېنو سیاسي ګوندونو، مدني ټولنو او ځوانانو د ټولنو استازیو نن په کابل کې د بېلابېلو غونډو په جوړولو سره د ولسي جرګې او ولسوالیو شوراګانو د راتلونکیو ټاکنو د رڼوالي او څرنګوالي په اړه اندېښنې په ډاګه کړې.
د ځوانانو اجتماعي او مدني ټولنو د همغږۍ مرکز مشر عبدالودود افغان وویل، په حکومت کې دننه او بهیر ځېنې کړۍ په لوی لاس په ټاکنو کې د درغلیو د زمینې د برابرولو لهپار اسانتیاوې برابروي او د ټاکنو د خپلواک کمېسیون په چارو کې لاسوهنه، د حکومتي مشرانو ترمنځ ستونزې، په ۲۰ ولایتونو کې د امنیتي وضعیت خرابېدل، له ۱۰۰۰ ډېرو ټاکنیزو مرکزونو نه فعالېدل او داسې نورې ستونزې دا په ډاګه کوي چې دا ټاکنې به له جدي مشکلاتو سره مخ وي.
د ځوانانو ټولنیزو او مدني ټولنو د همغږۍ مرکز مشر ښاغلي افغان زیاته کړه چې له درغلیو نه په ډکو ټاکنو کې به د خلکو ګډون کم وي او تر څنګ به یې ډېری خلک د رایې له ورکړې محروم شي.
ده په ورته وخت کې وړاندیز وکړ چې حکومت او د ټاکنو کمېسیون دې د راتلونکو ټاکنو په اړه جدي تدابیر ونیسي.
دغه راز نن په کابل کې د ځېنو سیاسي ګوندونو او مدني ټولنو غړیو هم د ټاکنو د څرنګوالي په هکله د یوې غونډې پرمهال په ټاکنو کې د درغلیو او فساد په اړه اندېښنې څرګندې کړې.
د سیاسي ګوندونو په استازولۍ د پارلمان وکیل او د حزب اسلامي غړي عبیدالله بارکزي په ټاکنو کې د زورواکانود لاسوهنې د مخنیوي، سیاسي ګوندونو ته د ټاکنو په پروسې کې د نظارت حق ورکول، په مرکزي او ولایتي ټاکنیزو دفترونه کې نوماندانو ته د خونو ځانګړي کول، په ټولو ولایتونو کې د ټاکنیزو مرکزونه عادلانه ایجاد، د سرتاسري ټاکنو تر سره کېدل، د ټاکنو رڼوالي ته جدي پام، ټولو وګړیو ته په ټاکنو کې د ګډون زمینه برابرول او ګڼې نورې غوښتنې وکړې.
دا پهداسې حال کې ده چې مدني ټولنې د ټاکنو د کمېسیون له لوري ۳ میلیونو ډېرو کسانو د نوملیکنې خبر ردوي.
