د افغانستان ژغورنې لپاره د سیاسي ګوندونو اېتلاف چې له ۱۷ سیاسي ګوندونو جوړ شوی، د لنډمهالي حکومت جوړېدو د مخالفت ترڅنګ، خو په هېواد کې د افغان حکومت او طالبانو ترمنځ د سولې پر خبرو اترو ټینګار کوي.
د دغه اېتلاف ویاند محمدیوسف امین ځاځي نن په کابل کې یوې خبري غونډې ته وویل، د مسکو غونډې په څېر له هېواده بهر د سولې خبرې مثبتې پایلې نهلري او باید دا لړۍ په هیواد کې وغځول شي.
د نوموړي په وینا، د افغانستان ژغورنې لپاره د سیاسي ګوندونو اېتلاف چمتو دی چې د سولې خبرو اترو په تړاو د افغان حکومت او طالبانو ترمنځ منځګړتوب وکړي.
په همدې حال کې د یاد اېتلاف رییس شاهمحمود پوپل وايي، که څه هم د سولې خبرو اترو پروسه په چټکۍ روانه ده، خو د سیاسي ګوندونو یا سیاستوالو په نوم هېڅوک نهشي کولای چې له هېواده بهر د افغانانو استازولي وکړي.
د مسکو غونډه؛ ټول بهرني ځواکونه دې ووځي
په ځېنو ولایتونو کې مسکو غونډې په غبرګون لاریونونه
د مسکو په غونډه کې څه تېر شول؟
د نوموړي په وینا، که څه هم د مسکو د غونډې یو شمېر ګډونوال په افغانستان کې پر فساد او د ملي شتمنیو په لوټلو تورن دي، خو هلته یې د افغانانو په استازولۍ خبرې کولې او همدا لامل دی چې موږ یې مخالفت کوو.
د افغانستان ژغورنې لپاره د سیاسي ګوندونو اېتلاف داسې مهال د افغان حکومت او طالبانو ترمنځ د منځګړتوب وړاندیز کوي چې د راپورونو له مخې، ټاکل شوې د طالبانو استازي راتلونکې اوونۍ لومړی د امریکا له استازیو او بیا د پاکستان له لومړي وزیر عمران خان سره په اسلاماباد کې وګوري.
