«د افغانستان د آزادۍ کور» نن شنبې د (جنورۍ پر ۷مه) په کابل کې د یوې خبري غونډې پرمهال په بهرني سیاست، جګړه، سوله او اقتصاي برخو کې د اوسني او پخواني حکومت د پرتلنې په اړه د یوې تازه نظرپوښتنې پایلې خپرې کړې.
د دې نظر پوښتنې ۴۲ سلنه ګډونوالو د بهرني سیاست په برخه کې اوسنی حکومت د حامد کرزي د حکومتولۍ په پرتله ښه بللی؛ خو له فساد سره د مبارزې په برخه کې ۳۲ سلنه پوښتل شویو بیا له پخواني حکومت بد بللی دی.
۳۶ سلنه پوښتل شویو برخه والو اوسنی حکومت د وړتیا له مخې مثبت ارزولی.
دغه راز، دغه نظرپوښتنه د جګړې او سولې په برخه کې ۷۷ سلنه پوښتل شویو اشخاصو په ځواب کې ویلي، چې د وسله والو طالبانو پر ضد امنیتي ځواکونه پياوړي شوي.
په همدې حال کې ۴۵ سلنه هېوادوالو بیا له حزب اسلامي سره د سولې هوکړه لیک لاسلیکول بې اغېزې بللې دي.
د دغې نظر پوښتنې پر مهال۶۰ سلنه پوښتل شویو وګړیو اوسنی حکومت د اسلامي هېوادونو، اروپا او امریکا سره نږدې بللی دی او له کړنو يي خوښي ښودلې ده.
دغه راز، ۶۱ سلنه نورو پوښتل شویو اوسنی حکومت له امریکا سره د هېواد ملي ګټو خونديتوب په اړه بریالی بللی دی.
له دې ټولو سره ـ سره د دغه بنسټ موندنې ښيي چې حکومت د عدلي او قضايي بنسټونو په سمون او له فساد سره مبارزه کې نه دی توانېدلی چې د خلکو غوښتنو او هیلو ته ځواب ووايي.
د نظرپوښتنې راپور او مواد ښيي، چې په ټوله کې د دغې نظرپوښتنې له وړاندې شويو شمېرو مالومېږي، چې له اوسني حکومت نه خلک د اقتصاي ـ بنسټيزو چارو د پياوړتیا په برخه کې خوښ ښکاري.
دغه نظرپوښتنه د هېواد په ۶ ولایتونو، کابل، بلخ، هرات، کندهار، ننګرهار او بامیانو ولایتونو کې له شاوخوا ۳ زرو کسانو سره په لیکلي ډول پوښتنې او ځوابونه ترلاسه کړي چې ۵۹ سلنه نارینه وو، ۴۱ سلنه مېرمنو سره مرکې شوي. د پوښتل شویو وګړیو ډېری برخې تر لیسانسه زده کړې لرلې.
