له کابله د ولسي جرګې ټاکنو ته لومړني نوملړ کې بریاليو نوماندانو له ټاکنیزو خپلواک کمېسیونونو وغوښتل چې د کابل ولایت وروستۍ پایلې اعلان کړي.
دوی خپلو پلویانو سره په ګډه د لاریون پرمهال وویل، سره لهدې چې د ولسي جرګې ټاکنو نه ۶ میاشتې تېرېږي؛ خو لا هم د کابل وروستۍ پایلې نهدي اعلان شوي.
معترض نوماند مولوي محمد خان ترهخېل او مرسل نبيزاده وايي، هر څه ژر د کابل د بریالیو نوماندانو د وروستي نوملړ اعلانولو او له هغې وروسته د ملي شورا پرانېستلو غوښتنه وکړه.
معترض نوماندان وايي چې د دوی رایورکوونکي له دوی غواړي چې ولې د نورو ولایتونو د استازیو په شان په ولسي جرګې کې حضور نهشي لرلی.
خو له کابله ولسي جرګې ته هغو یو شمېر نوماندانو ـ چې نومونه یې د بریاليو نوماندانو لومړني نوملړ کې نهدي راغلي ـ د یوې اعتراضیه غونډې پرمهال د کابل د پایلو باطلولو او د بیا ځلې ټاکنو ترسره کولو غوښتنه وکړه.
د معترضو نوماندانو ایتلاف غړی داود کلکاني وایي، که د دوی غوښتنه ونه منل شي؛ نو اعتراض ته به دوام ورکړي.
پر همدې مهال، د معترضو نوماندانو د ایتلاف ویاند فضلالله ممتاز وایي، د کابل ټاکنې دې باطلې اعلان شي او که ملي شورا پرانېستل کېږي؛ د بیاځلې ټاکنو ترسره کېدو پورې دې،
د نورو ولایتونو نوي او د کابل پخواني استازي خپلو چارو ته دوام ورکړي.
هڅه مو وکړه د معترضو نوماندانو غوښتنو په اړه د ټاکنیزو شکایتونو کمېسیون ځواب هم واخلو؛ خو پر ډېرو هڅو سربېره بیا هم ونه توانېدلو.
دا داسې مهال دی چې ټاکل شوې د کابل وکیلانو نهشتوالي کې د را روانې جمعې او یا شنبې په ورځ د ملي شورا ۱۷مه تقنیني دوره په رسمی توګه پرانېستل شي.
همداراز د غزني ولایت پخوانی وکیلان به هم د ولسي جرګې غونډو کې تر هغه ګډون کوي ترڅو چې له ولسمشرۍ ټاکنو سره د دې ولایت ټاکنې وشي.
ورته مطالب:
