ناتو باش کاتبی ینس استولتنبرگ نینگ ایتیشیچه، طالبان گروهی نینگ زوروانلیکلرنی کمهیتیریب آمریکا بیلن امضا قیلگن شرطنامهگه حرمت قیلیشی کیرهک. ناتو باش کاتبی افغانستان نینگ حاضرگی وضعیتینی خواطرلنترووچی عنوان قیلیب ایتیشیچه، اوشبو تشکیلات افغانستان برابریده بولگن تعهدلریگه توختهیدی.
جناب استولتنبرگ نینگ ایتیشیچه، ناتو افغانستانده بولگن قیینچیلیکلرگه شاهد دیر و بوتون سیاسی حزبلرنینگ افغانستانلیکلر ارا سوزلشوولرده زمینه یرهتیش اوچون سعی و حرکت قیلیشی کیرهک.
اونینگ کوپهیتیریشیچه: «بیز افغانستانده بولگن حضوریمیزنی کمهیتیرهمیز، بیراق افغانستان برابریده تعهدلیمیز و هر بیر ایشنی شرط اساسیگه انجام بیرهمیز.» اونینگ ایتیشیچه، اوشبو تشکیلات کوچلریدن 12 مینگ تهسینی افغانستانده قالیشی ممکن.
جناب استولتنبرگکه کوره، افغانستانده تینچلیک تامینلنیشی اوچون منطقه و پاکستان نینگ همکارلیک قیلیشی کیرهک.
ناتو باش کاتبی نینگ کرونا ویروسی خصوصیده ایتیشیچه، ناتو کرونا ویروسیگه توسیق بولیش اوچون سعی و حرکت قیلهدی، بیراق ماموریتیگه دوام بیرهدی، «چونکه بیز روپهره بولگن قیینچیلیک و تهدیدلر کرونا ویروسی نینگ چیقشی بیلن نابود بولمهیدی، بیز القاعده و داعش نینگ تهدیدی بیلن روپهرهمیز و بو تهدیدلر کرونا ویروسی چیقیشی بیلن نابود بولمهیدی و افغانستانده دایمی تینچلیک تامین قیلینیشی اوچون سعی و حرکت قیلهمیز.
جناب استولتنبرگ نینگ افغانستان سیاسی وضعیتی خصوصیده ایتیشیچه: «بیز افغانستانده بولگن سیاسی قیینچیلیکلردن آگاهمیز و سیاستچیلردن مذکور قیینچیلیکلرگه حل یول تاپیشلرینی ایستهیمیز و اولرنینگ کوچلی بیر تیم بیلن افغانستانلیکلر ارا سوزلشوولرده حضور تاپیشلری کیرهک. بیز بروکسل، واشنگتن، برلین و ناتو تشکیلاتیگه اعضا بولگن باشقه باشکنتلر بیلن کوپینچه فعالیت قیله آلهمیز، بیراق نهایتده افغانستانلیکلر، کیلهجکلری اوچون سعی و حرکت قیلسینلر؛ انهشو سبب بیز افغانستانلیکلر رهبرلیگیگه بولگن افغانستانلیکلر ارا سوزلشوولردن حمایت قیلهمیز.»
ناتو باش کاتبی نینگ ایتیشیچه، اوشبو تشکیلات افغانستانده سیاسی، مالی و حربی نقطه نظردن حمایتلریگه دوام بیرهدی، چونکه تینچلیک لایحهسیدن حمایت قیلیش اوچون اساسی یول دیر و طالبان گروهی اوروش میدانیگه موفق بولمهیدی و افغانستانده بولگن قیینچیلیکلرنی حل قیلیش اوچون اساسی یول مذاکره دیر.
