په کابل کې نن د پخواني جهادي رهبر حضرت صبغتالله مجددي د مړینې لومړي تلین نمانځغونډه کې سياسيونو د امریکا او طالبانو ترمنځ د تاوتریخوالي د کمېدو په اړه د احتمالي هوکړې له خبره خوشحاله دي.
د تاوتریخوالي د احتمالي کمېدو هوکړه چې د افغانستان دولت او طالبانو ترمنځ د خبرو اترو پیل لپاره لومړنی مهم ټکی ګڼل کېږي، اوس د امریکا د مېز پر سر دی.
د ملي يووالي حکومت اجرايیه رییس عبدالله عبدالله وايي، هیلې رامنځته شوي، خو ټولې چارې په حل کېدو نه دي؛ خو د افغانستان پخوانی ولسمشر حامد کرزی بيا وايي، سوله دې خدای تعالی راولي.
سولې ته د رسېدو او د سولې خبرو اترو د پلاوي رامنځته کولو پر سر د افغانستان د سیاسيونو ترمنځ د اختلاف ټولیز لامل، د دوی بېلابېلې غوښتنې دي.
د امریکا او طالبانو ترمنځ د احتمالي هوکړې په صورت کې، په کور دننه احتمالي لانجو رامنځته کېدو ډېر شمېر سیاسيون اندېښمن کړي دي.
که څه هم د سیاسي فعالانو ډلې، د خبرې کوونکي پلاوي په رامنځته کولو کې د جمهوري اسلامي نظام تر چتر لاندې د سیاستوالو او دولت په ګډو کوښښونو ټینګار کوي؛ خو له نه جوړېدو وېره لري.
د افغانستان د پخواني ولسمشر مرستیال یونس قانوني یو له دغو وېرېدونکيو دی.
د محمد اشرف غني په حکومت کې د افغانستان د ملي امنیت پخوانی سلاکار حنیف اتمر وايي، د افغانستان د اسلامي جمهوریت تر چتر لاندې له نه جوړېدو او د پلاوي د رامنځته کېدو د وتلو لپاره، نقشه لري.
د اتمر په خبره، د ملي مصالحو شورا باید رامنځته شي او خبرې کوونکی پلاوی باید له دغې شورا امر ترلاسه کړي.
نوموړي له سیاستوالو وغوښتل چې ټاکنیز اختلافونه څنډې ته کړي او د ملي مصالحې شورا رامنځته کولو لپاره لاس په کار شي.
دا په داسې حال کې ده چې پخوا تر دې په دولت کې د محمد اشرف غني پلویانو، د مصالحې د عالي شورا د جوړېدو طرحه مخکې کړې وه چې له طالبانو سره د خبرې کوونکي پلاوي لپاره د سلا ورکولو دنده درلوده چې د سولې په اړه د اوامرو د صادرولو سرچينه نه وه.
بل لور ته د محمد اشرف غني سلاکار وحید عمر هیله څرګنده کړې چې امریکا او طالبان هرڅه ژر پایلې ته ورسېږي؛ څو د سولې خبرو اترو پیل لپاره موکې برابره شي.
