همهشمول حکومت جمهور رئیسی عبدالله عبدالله، حکومت نینگ مذاکرهچی هیأت تشکیلینی خوش قرشیلب و اونی افغانستانلیکلر ارا مذاکره باشلهنیشی اوچون «اونملی آدیم» دییدی.
جناب عبدالله اوز فیسبوک صحیفهسیده نشر قیلگن پیامیده ایتیشیچه، مذکور هیأت ترکیبی توغریسیده ایریم تامانلر تامانیدن ملاحظهلر مطرح قیلینگن و اولر درک قیلینهدی. بوندن آلدین، جناب عبدالله نینگ یقینلریدن بیری بولگن امید میثم، حکومت تامانیدن تشکیل ایتیلگن مذاکرهچی هیأت ترکیبی گه عکسالعمل، دولت تامانیدن نشر قیلینگن هیأت رویخطی جامع ایمس دیگن ایدی.
جناب عبدالله نینگ ایتیشیچه: «مذاکرهچی تیم افغانستان اسلامی جمهوریتی و مملکت نینگ ملی منفعتلریدن نمایندهلیک قیلهدی. گزارش بیریش طریقهسی و بو تیم گه صلاحیت بیریش قیناق توغریسیده کوپراق بحث قیلینیشی کیرهک.»
عبدالله عبدالله نینگ کوپهیتیریشیچه، او و تیمی تینچلیک مسئلهسینی باشقهلر موضوعلرنی تأثیری آستیگه آلمهسی توغریسیده سعی و حرکت قیلهدی.
جناب عبدالله، هیأت تشکیلینی خوش قرشیلگن بیرچاغده، طالبان گروهی بیر اعلامیه نشر قیلیب افغانستان حکومتی نینگ مذاکرهچی هیأتینی رد قیلگن و بونگه عکسالعمل ایتیشیچه، مذکور هیأت تانیشتیریلیشی، بو گروه و آمریکا آرهسیده امضالنگن تینچلیک کیلیشوونامهسینی متنی گه قرشی دیر.
طالبان گروهی نینگ اعلامیهسیده کیلیشیچه: «اعلان ایتیلگن تیم کابل ادارهسی تامانیدن تانیشتیریلگن و بو ایسه بیزلرنینگ اصولیمیز و امریکا بیلن امضالنگن کیلیشوونامه گه قرشی دیر.»
طالبان گروهی نینگ اعلامیهسیده آچیقلنیشیچه، «کابل دولتی» افغانستانلیکلر ارا مذاکره ده باشقه جهتلرنی یانیده، بیر اشتراکچی صفتیده اشتراک قیله آلهدی. اوشبو گروه نینگ ایتیشیچه، بوتون مملکت گه تیگیشلی بولگن موضوع نی بیر گروه یا-ده افغانستان حکومتی قولگه آلمهسی کیرهک.
بوندن آلدین، افغانستان تینچلیک لایحهسی بوییچه آمریکا نمایندهسی زلمی خلیلزاد، بو هیأت نی «همهشمول» دیگن.
افغانستان دولتی طالبان گروهی بیلن مذاکره قیلیش اوچون ملی خوفسیزلیک عمومی ریاستی نینگ سابق باشلیغی محمدمعصوم استانکزی نینگ ییتکچیلیگیده 21 کیشیلیک بیر هیأت تانیشتیرگن.
